Дар анбори корхонаҳои саноатию энергетикӣ 1 млн. 75 ҳазор тонна ангишт захира шудааст

Душанбе, 22.09.2016 /АМИТ «Ховар»/. Мувофиқи маълумоти фаврӣ истихроҷи ангишт аз аввали сол то 20 сентябри соли ба 932,7 ҳазор тонна расонида шуд, ки нисбат ба ҳамин давраи соли сипаригардида 256 ҳазор тонна зиёд мебошад. Захираи ангишт то 20 сентябри соли равон дар анбори корхонаҳои соҳа бо назардошти бақияи соли сипаригардида 195,2 ҳазор тоннаро ташкил медиҳад.
Тавре ки аз Вазорати саноат ва технологияҳои нав ба АМИТ «Ховар» хабар доданд, дар ин давра аз ҷониби МБГ- 364,5 ҳазор тонна, корхонаҳои саноатӣ- 383,8 ҳазор тонна, муассисаҳои буҷавӣ- 39,2 ҳазор тонна ва аҳолӣ 129,2 ҳазор тонна, дар маҷмӯъ бо назардошти бақияи ангишт дар анбори корхонаҳои саноатию энергетикӣ 1 млн. 75 ҳазор тонна ангишт захира карда шуд.
Вазорати саноат ва технологияҳои нави Ҷумҳурии Тоҷикистон ҷиҳати таъмини фаъолияти мунтазам ва самарабахши соҳаҳои иқтисодиёт ва иҷтимоиёти ҷумҳурӣ ба ангишт дар давраи тирамоҳу зимистони солҳои 2016-2017, махсусан МБГ тамоми тадбирҳоро андешидааст. Новобаста аз мушкилиҳо корхонаҳои истихроҷкунандаи ангишт имкони пурра таъмин намудани соҳаҳои иқтисодиёт ва иҷтимоиёти ҷумҳуриро доранд.