Дар Душанбе ҷаласаи ёздаҳуми раисони судҳои олии давлатҳои аъзои Созмони ҳамкории Шанхай баргузор мегардад

Душанбе, 21.09.2016. /АМИТ «Ховар»/. Пагоҳ дар шаҳри Душанбе дар Китобхонаи миллии Тоҷикистон ҷаласаи ёздаҳуми раисони судҳои олии давлатҳои аъзои Созмони ҳамкории Шанхай (СҲШ) баргузор мегардад. Дар он роҳбарон ва намояндагони судҳои олии давлатҳои аъзои СҲШ иштирок мекунанд.
Дар ин бора ба хабарнигори АМИТ «Ховар» мудири бахши иттилоотии Суди олӣ Беҳрӯз Шафоев хабар дод.
Ба иттилои Беҳрӯз Шафоев, мувофиқи рўзномаи ҷаласаи навбатӣ масъалаҳои мубрами рӯз- мубодилаи таҷриба оид ба баррасии парвандаҳои марбут ба терроризм ва экстремизм, масъулияти падару модар дар таълиму тарбияи фарзанд тибқи қонунгузории давлатҳои аъзои Созмони ҳамкории Шанхай, инчунин амалияи судии ин давлатҳо оид ба аз нав баррасӣ намудани ҳалнома ё таъйиноти эътибори қонунӣ пайдо намудаи суд вобаста ба ҳолатҳои нав ошкоргардида мавриди баррасӣ қарор мегиранд.
Бояд зикр намуд, ки давлатҳои аъзои Созмони ҳамкории Шанхай дар давоми 15 сол дар самти таъмини амният, ҳифзи сулҳу суботи кишварҳо ва таъмини рушди иқтисодию иҷтимоии минтақа ҳамкории судманд доранд.
Иштироки Тоҷикистон дар ин созмони байналмилалӣ ба хотири густаришу таҳкими муносибатҳои неки ҳамсоягию дӯстона ва инкишофи муносибатҳои иқтисодӣ равона карда шудааст.
Мақомоти судӣ дар самти муқовимат зидди ҷиноятҳои террористӣ ва экстремистӣ, гардиши ғайриқонунии воситаҳои нашъадор ва дигар ҷиноятҳои фаромиллӣ нақши муҳим доранд.
Шиддат гирифтани таҳдидҳои муосир тақозо менамояд, ки бар зидди терроризм ва экстремизми байналмилалӣ тадбирҳои муосири якҷоя андешида шаванд.