Дар ноҳияи Лахш 10 лоиҳаи давлатии сармоягузорӣ татбиқ гардида, татбиқи се лоиҳаи дигар идома дорад

Душанбе, 26.09.2016. /АМИТ «Ховар»/. Давлат ва Ҳукумати мамлакат дар зарфи 25 сол барои рушди ноҳияи Лахш ва ҳалли масъалаҳои соҳаҳои ҳифзи иҷтимоӣ, кишоварзӣ, сохтмону роҳҳо ва дастгирии буҷети маҳаллӣ беш аз 600 миллион сомонӣ равона кардаанд.
Дар ин бора Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни мулоқот бо фаъолон ва сокинони ноҳия Лахш изҳори ақида намуд.
Ба маълумоти Пешвои миллат, дар ин муддат дар ноҳия 10 лоиҳаи давлатии сармоягузорӣ ба маблағи 370 миллион сомонӣ татбиқ гардида, ҳоло татбиқи се лоиҳаи дигар ба маблағи қариб 300 миллион сомонӣ идома дорад.
«Дар натиҷаи истифодаи самараноки маблағҳои ҷудошуда тӯли солҳои 1997 — 2015 дар ҳудуди ноҳия 450 иншооти таъйиноти гуногун, аз ҷумла 40 пул, 21 бинои нави таълимӣ, 22 муассисаи тандурустӣ ва дигар иншооти хизматрасонӣ бунёд гардида, биноҳои таълимии 76 мактаб аз таъмири асосӣ бароварда шуда, ба 35 деҳаи дурдасти ноҳия хатти оби нӯшокӣ гузаронида шудааст, — илова намуд Роҳбари давлат.