Доктори илмҳои тиб: «Фазои олуда аз чангу ғубор боиси ба организми инсон ворид шудани микробҳои касалиовар мегардад»

Душанбе, 30.09.16./АМИТ «Ховар»/. Таъсири обу ҳаво ба ҷинсияти одам хеле муҳим мебошад, зеро инкишофи одам аз таъсири муҳити зист вобаста аст. Фазои олуда аз чангу ғубор муҷиби ба организми инсон ворид шудани микробҳои касалиовар мегардад. Масалан, зани ҳомиладор вақте ки чангу ғубори ҳаворо нафас мекашад, зарраҳои он ба шуш ворид шуда, бо хун якчоя мешаванд, ки ин ба инкишофи ҷанин метавонад халал расонад. Дар таркиби чангу ғубор оксиди оҳан ва дигар оксидҳо мавҷуданд, ки алалхусус ба мағзи сари ҷанин таъсири манфӣ мерасонанд.
Ин нуктаро зимни суҳбат бо хабарнигори АМИТ «Ховар» доктори илмҳои тиб, муовини директори Маркази илмии клиникавии педиатрӣ ва ҷарроҳии кӯдакон Абдусалом Воҳидов зикр намуда, иброз дошт, ки пургарду ғубор шудани ҳаво ба вазъи саломатии бемориҳои диққи нафас, буғумдард ва фишори хуну нафас низ зарар мерасонад. Ин ашхос бояд дар ин рӯзҳо бе зарурат аз манзили худ берун нашаванд .

Тибқи назари мутахассис, бар асари ғуборолуд гаштани ҳаво бемориҳои модарзодӣ, узвҳои нафаскашӣ, варами ҳалқ бештар хуруҷ мекунанд ва номураттабии кори рагҳои дилро ба вуҷуд меоранд, ки ин ба саломатии ин гуна беморон хатари ҷиддӣ дорад.
Ёдовар мешавем, ки аз шаби гузашта инҷониб дар Тоҷикистон хокбориш «талотум» дорад ва он тамоми минтақаҳои ҷумҳуриро ғуборолуд намудааст. Бино ба маълумоти Агентии обуҳавошиносии Ҷумҳурии Тоҷикистон, ғубори чанголуд бо номи «боди афғонӣ» аз ҷониби Қазоқистон ва Сибир бошиддат вазида, бо сабаби ҳаракати зиддисиклони ғарбӣ аз Урал ҷумҳуриро фаро гирифтааст.
Бино ба иттилои манбаъ, ҳавои ғуборолуд то 2 октябр идома меёбад. Ҳавои сард ду рӯз идома ёфта, аз 3 октябр баландшавии ҳарорати ҳаво дар назар аст.