«Духтари Сайҳун» дар 1-умин Кинофестивали байналмилалӣ сазовори Шоҳҷоиза шуд

Душанбе, 21.09.2016 /АМИТ «Ховар»/. Аз 16 то 20 сентябри соли равон бо ташаббуси ташкилоти ҷамъияти «Навсоз» бахшида ба 25- солагии Истиқлолияти давлатии Ҷумҳурии Тоҷикистон дар шаҳри Душанбе 1-умин Кинофестивали байналмилалии филмҳои кӯтоҳ таҳти унвони «Навсоз» баргузор гардид. Дар Кинофестивали мазкур 27 филми филмсозон аз Афғонистон, Эрон, Беларус, Русия, Қирғизистон, Қазоқистон, Ўзбекистон ва Арманистон ширкат варзиданд.
Баъди баҳогузорӣ филми «Духтари Сайҳун» -и коргардон Далери Эмомалӣ аз «Суғдсинамо» сазовори Шоҳҷоиза гардида, беҳтарин филми ҳуҷҷатӣ дониста шуд.
Дар бахши беҳтарин филми бадеӣ филми «Гунҷишки сафед» интихоб гардида, дар бахши наворбардори беҳтарин Умар Бостони Фардӣ бо филми «Акс» ва дар беҳтарин сенария филми «Киноосвещения» ғолиб дониста шуданд.
Ба ғолибони кинофестивал ҷом, диплом ва туҳфаҳои хотиравӣ тақдим карда шуданд.
Дар ин бора аз Ташкилоти ҷамъиятии «Навсоз» ба АМИТ «Ховар» хабар доданд.