Истиқлолияти давлатӣ шароити арзандаро барои татбиқи манфиатҳои миллии кишвар ба вуҷуд меорад

Душанбе, 6.09.2016 /АМИТ «Ховар»/. Имрӯз, 6 сентбр дар Академияи илмҳои Ҷумҳурии Тоҷикистон Конфронси ҷумҳуриявӣ дар мавзӯи «Хатарҳои муосири геополитикӣ ба Истиқлолияти давлатии Ҷумҳурии Тоҷикистон: роҳҳо ва усулҳои пешгирӣ аз онҳо» баргузор гардид.
Конфронси мазкур бо ибтикори Ҳизби Ҳалқии Демократии Тоҷикистон, Ташкилоти ҷамъиятии ҷавонон «Созандагони Ватан» баргузор гардида, дар он олимону кормандони Академияи илмҳои ҷумҳурӣ иштирок намуданд.
Дар конфронс сардори Раёсати таҳлил ва ояндабинии сиёсати дохилии Маркази тадқиқоти стратегии назди Президенти Ҷумҳурии Тоҷикистон Шералӣ Ризоён доир ба мавзӯи «Таҳкими Истиқлолияи давлатӣ ҳамчун меҳвари манфиатҳои миллии Тоҷикистон» сухан карда, аз ҷумла иброз дошт, ки дар тӯли 25 соли Истиқлолияти давлатӣ тамоми рамзҳои давлати соҳибихтиёр шакл гирифтанд, ки имрӯз дар самти рушд додани эҳсоси ватанпарастӣ ва давлатмеҳварии шаҳрвандон васеъ истифода мешаванд.
«Истиқлолияти давлатӣ шароити арзандаро барои ташаккул, шинохт ва татбиқи манфиатҳои миллии кишвар ба вуҷуд меорад. Худи мафҳуми «соҳибихтиёрӣ» ҷузъи ҷудонопазири консепсияи манфиатҳои миллӣ буда, шароити мувофиқ барои татбиқи он мебошад»,- гуфт Шералӣ Ризоён ва илова намуд, ки: «Ҳифзи истиқлолияти давлатӣ аз афзалиятҳои доимии давлати миллӣ ба шумор меравад ва барои татбиқ гардидани манфиатҳои миллӣ мусоидат мекунад».
Дар замони истиқлолияти давлатӣ Тоҷикистон ба як қатор дастовардҳои усулӣ ноил гардид, ки ҳамаи онҳо таҳти роҳбарии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо пуштибонии мардуми кишвар рӯи даст омаданд. Рушд ва таҳкими дастовардҳои соҳибихтиёрии давлатӣ барои наслҳои минбаъда фазои озод ва шароити мусоидро ба вуҷуд меорад, ки дар дарозмуддат барои ҳифзу татбиқи манфиатҳои миллии Тоҷикистон мақоми калидӣ дорад.