Оби осоишгоҳи «Авҷ» муъҷизаҳои зиёд дорад: ба 55 дард даво мебахшад, 18 дардро бидуни ҷарроҳӣ табобат мекунад

Хоруғ, 21.09.2016. /АМИТ «Ховар»/. Мутахассисони риштаи тиб мегӯянд, ки осоишгоҳи «Авҷ»-и ноҳияи Ишкошим ба 55 дард даво мебахшад ва 18 дардро бидуни ҷарроҳӣ табобат мекунад. Глушников Василий Иванович, як сокини вилояти Пензаи кишвари Русия гуфт, ки: «солҳост дарди миёну асаб маро озор медиҳад. Чор бор рӯи мизи ҷарроҳӣ хоб кардам. Дардам сабук нашуд. Фалаҷ гаштам. Аз зиндагӣ умедамро кандам. Дӯстони тоҷики муқими Русия дар бораи муъҷизаи оби ин чашма ба ман муълмот доданд ва тавсия карданд, ки ҳатман як бор ба ин ҷо биёям. Ҳоло ду ҳафта аст, ки дар осоишгоҳи «Авҷ» мебошам. Бовар нокарданист, аммо ман комилан шифо ёфтам. Аз зодгоҳам бо асо омадам ва аз ин ҷо бе асо меравам. Онро барои хотира дар осоишгоҳ мемонам».
Сардухтури осоишгоҳ Қаноат Мавлонқулов чунин мегӯяд: «Дар таркиби оби чашма моддаҳои кимиёвии никел, молибден, ион ва амсоли инҳо мавҷуданд, ки барои саломатии инсон хеле фоидаовар мебошанд. Об барои 18 намуди беморӣ, ки одатан бо ҷарроҳӣ анҷом меёбанд, даво мебахшад. Барои мисол, агар дар бинӣ гӯшт пайдо шавад, онро ҷарроҳӣ мекунанд ва баъди чанд муддат ин гӯшт дуюмбора аз худ дарак медиҳад. Аммо оби чашма баъди як ҳафта ин гӯштро бидуни ягон захму озор аз байн мебарад. Ин об муъҷизаҳои зиёд дорад, аммо афсӯс, ки дар бораи он сокинони кишвар ва берун аз он маълумоти кам доранд».