Пешвои миллат: «Итминон дорам, ки раванди неки корҳои ободониву созандагӣ минбаъд низ дар ноҳияи Тоҷикобод идома меёбад»

Душанбе, 26.09.2016 /АМИТ «Ховар»/. «Боиси таассуф аст, ки тобистони соли гузашта ва соли равон офати табиии рухдода дар баробари дигар ноҳияҳои водии Рашт ба аҳолии ноҳияи Тоҷикобод низ хисороти зиёди молӣ расонид»,- изҳор намуданд имрӯз дар мулоқот бо сокинони ноҳияи Тоҷикобод Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон.
Ҳамчунин Сарвари давлат иброз доштанд, ки бо мақсади ҳалли саривақтии масъалаҳои вобаста ба барқарорсозии оқибатҳои офати табиӣ бо супориши Роҳбари давлат комиссияи ҳукуматӣ таъсис дода шуд. Дар натиҷаи андешидани тадбирҳои фаврӣ харобиҳои офати табиӣ дар муҳлати хеле кӯтоҳ бартараф карда шуда, сокинони зарардида сари вақт бо манзили зист ва лавозимоти зарурии рӯзгор таъмин гардиданд.
Пешвои миллат таъкид намуданд, ки: «дар давоми солҳои соҳибистиқлолӣ дар доираи татбиқи барномаҳои рушди соҳавию минтақавӣ ва иқдому ташаббусҳои созандаи фарзандони ватандӯсти кишварамон дар ноҳияи Тоҷикобод ва умуман водии Рашт, корҳои зиёди ободониву созандагӣ амалӣ шудаанд ва итминон дорам, ки ин раванди нек бо азму талоши сокинон минбаъд низ идома хоҳад ёфт.
Дар ин давра аз ҳисоби ҳамаи манбаъҳои маблағгузории буҷети давлатӣ барои рушди соҳаҳои иқтисодиву иҷтимоӣ, аз ҷумла сохтмони иншооту роҳҳо ва дастгирии буҷети ноҳия 432 миллион сомонӣ равона гардида, дар се соли оянда барои таъмини пешрафту тараққиёти он боз зиёда аз 86 миллион сомонӣ пешбинӣ шудааст», зикр намуданд Президенти Ҷумҳурии Тоҷикистон муҳтарам Эмомалӣ Раҳмон.