Шароити мусоиди иқлими ноҳияи Рашт имкон медиҳад, ки дар оянда боғдорӣ чун самти асосии соҳаи кишоварзӣ тараққӣ дода шавад

Душанбе, 28.09.2016 /АМИТ «Ховар»/. 27 сентбри соли равон Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолону сокинони ноҳияи Рашт вохӯрӣ анҷом дода, иброз доштанд, ки дар замони соҳибистиқлолӣ дар ноҳияи Рашт нишондиҳандаҳои соҳаи кишоварзӣ, аз ҷумла истеҳсоли меваю сабзавот, картошкаву ғалла ва дигар навъҳои маҳсулоти кишоварзӣ бамаротиб зиёд шуда, соли 2015 дар ҳамаи шаклҳои хоҷагидорӣ ба маблағи қариб 400 миллион сомонӣ маҳсулот истеҳсол карда шудааст.
Ба гуфтаи Пешвои миллат, тибқи нақша дар ноҳияи Рашт аз худ кардани 1150 гектар замини нав пешбинӣ шудааст, ки амалӣ намудани ин кор ва мусоидат кардан ба афзоиши ҳаҷми истеҳсоли маҳсулоти кишоварзӣ, бахусус, картошка ҳамчун зироати асосии ноҳия, инчунин парвариши навъҳои содиротии мева вазифаи Вазорати кишоварзӣ, Агентии беҳдошти замин ва обёрӣ ва мақомоти иҷроияи ҳокимияти давлатии ноҳия мебошад.
«Боғдорӣ яке аз бахшҳои асосии соҳаи кишоварзии ноҳия ба ҳисоб рафта, дар афзун гардонидани имкониятҳои содиротии ноҳия ва бо ҷойи корӣ таъмин намудани аҳолӣ нақши муҳим дорад»,- баён доштанд Сарвари давлат ва илова намуданд, ки «Шароити мусоиди иқлими ноҳия имкон медиҳад дар оянда боғдорӣ ҳамчун яке аз самтҳои асосии соҳаи кишоварзии ноҳия тараққӣ дода шавад».
Бо ин мақсад дар панҷ соли охир дар хоҷагиҳои ноҳия 550 гектар боғҳои нав бунёд карда шудаанд, ки барои дар ояндаи наздик хеле зиёд намудани истеҳсоли мева ва содироти он имконияти хуб фароҳам меорад.