Суҳбати созанда бо донишҷӯёни ДДК бо мақсади баланд бардоштани ҳисси ватандӯстӣ, эҳтироми арзишҳо ва пос доштани муқаддасоти миллӣ

Душанбе, 28.09.2016. /АМИТ «Ховар»/. 27 сентябри соли равон бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади баланд бардоштани ҳисси ватандӯстӣ, худшиносию худогоҳӣ, эҳтироми арзишҳо ва пос доштани муқаддасоти миллӣ бо донишҷӯёни Донишгоҳи давлатии Кӯлоб (ДДК) ба номи Абӯабдуллоҳи Рӯдакӣ вохӯрӣ доир гардид.
Зимни вохӯрӣ зикр гардид, ки Ҳукумати кишвар сиёсати давлатии ҷавононро самти муҳим ва афзалиятнок муайян намудааст. Бинобар ин, роҳбари давлатамон Асосгузори сулҳу Ваҳдати миллӣ, Пешвои миллат, муҳтарам Эмомалӣ Раҳмон нақши ҷавононро дар рушди ҳаёти сиёсию иҷтимоӣ ҳамчун неруи пешбарандаи ҷомеа, давомдиҳандаи анъанаҳои неки давлатдорӣ ва татбиқгари ҳадафҳои олии имрӯзу фардои Ватан арзёбӣ намудаанд. Ҷавонон ҳамеша дар маркази таваҷҷуҳи бевоситаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор доранд ва барои ба камол расонидани насли боилму маърифат дар ҷумҳуриамон тамоми шароит фароҳам оварда шудааст.
Бо мақсади ҳавасмандгардонии ҷавонон зимни вохӯрӣ озмун доир карда шуд, ки ғолибон бо туҳфаҳои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон қадрдонӣ карда шуданд.