Таҷлили ҷашни пуршукӯҳи 25-солагии Истиқлолияти Тоҷикистон дар Берлин

Душанбе, 16.09.2016. /АМИТ «Ховар»/. 14 сентябри соли равон дар бинои асосии «Дойче Банк»-и шаҳри Берлин бо ташаббуси Сафорати Ҷумҳурии Тоҷикистон дар Олмон зиёфати расмӣ бахшида ба 25-солагии Истиқлолияти давлатии Ҷумҳурии Тоҷикистон баргузор гардид.
Тавре аз Сафорати Ҷумҳурии Тоҷикистон дар Олмон ба АМИТ «Ховар» хабар доданд, ба ҷамъомади ҷашнӣ намояндагони Ҳукумати федеролӣ, вакилони Бундестаг, корпуси дипломатӣ, доираҳои иқтисодӣ ва фарҳангӣ, аъзои Ҷамъияти дӯстии Тоҷикистону Олмон, олимон ва чеҳраҳои шинохта, инчунин ҳамватанони муқими Олмону донишҷӯёни тоҷик даъват шуда буданд.
Сафири Фавқулода ва Мухтори Тоҷикистон дар Олмон Маликшо Неъматов ҳозиринро бо ин ҷашн табрик гуфта, 25 соли соҳибистиқлолии давлати навини тоҷиконро давраи муҳим ва пурифтихор арзёбӣ намуда, иброз дошт, ки Тоҷикистон дар ин давра таҳти роҳбарии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳама бахшҳо ба натиҷаҳои назаррас ноил гардид.
Намояндаи ваколатдори Вазорати корҳои хориҷии Олмон Михаил Зиберт мардуми Тоҷикистонро бо ин ҷашни миллӣ табрик гуфта, омодагии кишварашро дар вусъату густариши минбаъдаи муносибатҳои дуҷониба бо Тоҷикистон изҳор намуд.
Дар ҷамъомади ҷашнӣ ба ҳозирин намоиши асарҳои рассомони тоҷик, ки бозгӯи таърихи куҳан ва табиати зебою нотакрори Тоҷикистон мебошанд, инчунин филми мустанад оид ба ҳаёти имрӯзаи кишвар пешкаш гардиданд. Ҳамчунин сарояндаи шинохта Ҷаъфари Ҷалол бо сурудҳои ватандӯстона хотири ҳозиринро шод гардонд.
Ба меҳмонони ҷамъомади ҷашнӣ зиёфати идона иборат аз хӯрокҳои миллӣ, аз ҷумла оши палав пешниҳод гардид.