Тантанаҳои ҷашни 25-солагии Истиқлолияти Ҷумҳурии Тоҷикистон дар Кувайт

Душанбе, 17.09.2016 /АМИТ «Ховар»/. Сафорати Ҷумҳурии Тоҷикистон дар Давлати Кувайт тасмим гирифтааст, ки мутобиқи нақшаи кории хеш вобаста ба 25-солагии Истиқлолияти Ҷумҳурии Тоҷикистон 21-22-юми сентябри соли 2016 дар кишвари иқомат чорабиниҳои ҷашнӣ баргузор намояд.

Интизор меравад, ки дар расми баргузории он иштироки роҳбарони мақомоту идораҳои давлатии Кувайт, аъзои парламент, корпуси дипломатӣ, намояндагони ташкилотҳои байналхалқӣ, аҳли илму маданият, кормандони воситаҳои ахбори омма, инчунин тоҷирону соҳибкорон ширкат кунанд.

Барои ширкат намудан дар ҷамъомади мазкур гурўҳи рақсии Муссисаи давлатии «Мактаби Зебо Аминзода» бо ҳамдастии ансамбли созҳои миллӣ, ансамбли созҳои зарбӣ, ҳайати сарояндагон ва чеҳраҳои маъруфи ҳунарҳои мардумӣ, аз кандакорону устоҳои оҳангари чирадасти кишварамон ташриф оварда, бо беҳтарин оҳангҳои тозаэҷод ва классикии тоҷикӣ, инчунин намоиши ҳунарҳои дастии хешро ба маърази диди меҳмонони хориҷӣ хоҳанд гузошт.

Дар ҳошияи ҷамъомад ба расми таблиғу ташвиқи дастовардҳо аз сиёсати дохиливу хориҷӣ ва иқтисодиву фарҳангӣ, ҷиҳати бештар ошно намудани мардумони кишвари иқомат ва дигар меҳмонони хориҷӣ бо таърихи фарҳангу тамаддуни миллати тоҷик ба тариқи расонаҳои хабарии кишвари иқомат роҳандозӣ хоҳад шуд.