Анҷумани IV омўзгорони ИДМ: қадрдонии 5 намояндаи Ҷумҳурии Тоҷикистон бо нишони «Аълочии маорифи ИДМ»

Душанбе, 11.10.2016 /АМИТ «Ховар»/. Дар Анҷумани IV омўзгорон ва кормандони соҳаи маорифи кишварҳои узви Иттиҳоди давлатҳои Мустақил 5 намояндаи соҳаи маориф аз Ҷумҳурии Тоҷикистон бо нишони «Аълочии маорифи ИДМ» қадрдонӣ шуданд.
Тавре ки аз Вазорати маориф ва илми кишвар хабар доданд, дар кори Анҷуман 14 намояндаи соҳаи маорифи кишвари мо ширкат намуданд.
Раиси Шўрои Ассамблеяи байнипарлумонии кишварҳои аъзои Иттиҳоди Давлатҳои Мустақил Валентина Матвиенко дар анҷуман иброз дошт, ки низоми маорифи кишварҳои узви ИДМ бо шакли низоми маорифи миллӣ рушд карда, ҳамкории судманди байнидавлатӣ ба роҳ монда шудаанд.
Вазири маориф ва илми Федератсияи Русия Олга Василйева вобаста ба шароити кунунӣ, низоми таълиму тадриси тағйирёбанда, таваҷҷуҳ ба таҷрибаи нав, технологияи муосир ва муҳимтар аз ҳама, таваҷҷуҳ ба омўзиши омўзгорони кишварҳои ИДМ, ки бештар гардидааст, сухан кард.
Раҳматулло Мирбобоев, муовини аввали вазири маориф ва илми Ҷумҳурии Тоҷикистон таъкид намуд, ки ояндаи ҳар кишвар аз рушди маориф ва илм вобаста аст. «Аз ин рў, тамоми кўшишу ғайрати мо ба тарбияи насли босаводу маълумотнок, соҳибмаърифату болаёқат равона шудааст, зеро маҳз ҷавонони болаёқату соҳибмаърифат метавонанд дар пешбурди ҷомеа саҳмгузор бошанду дар ҷаҳони мутамаддин дастовардҳои худро муаррифӣ намоянд»,-илова намуд Р.Мирбобоев.
Хотиррасон мекунем, ки дар кори анҷуман беш аз 400 нафар аз 8 кишвар — Арманистон, Беларус, Қазоқистон, Қирғизистон, Молдова, Русия ва Туркманистон ширкат намуданд.