Бозии «Истиқлол» ва « Равшан» мусовӣ анҷом ёфт

Душанбе, 27.10.2016 /АМИТ «Ховар»/. Дирӯз дастаҳои футболи «Истиқлол»-и Душанбе бо дастаи «Равшан»-и Кӯлоб» ва «Хуҷанд»-и Хуҷанд бо «Ҳосилот»-и Фархор дар доираи бозиҳои ҷавобии нимниҳоии Ҷоми Тоҷикистон дар шаҳри Кӯлоб ва Хуҷанд бозӣ карданд. Бозӣ байни дастаҳои «Истиқлол»-и Душанбе ва «Равшан»-и Кӯлоб мусовӣ ва бидуни гол анҷом ёфт.
Ёдрас мешавем, ки дар рақобатҳои нахустини дастаҳо дастаи «Истиқлол» бо ҳисоби 4:0 ғалаба ба даст оварда буд. Дар вохӯрии дигар, ки дар шаҳри Хуҷанд сурат гирифт, меҳмонон пирӯз шуданд. Ҳарчанд дар қисми аввали дидор ҳолатҳои зиёди хатарнок дар назди дарвозаҳои дастаҳо ба назар мерасид, то дақиқаҳои охирин дар қисми аввали бозӣ гол зада нашуд. Бозингарони бошгоҳи «Ҳосилот»-и Фархор дар дақиқаи 41-уми бозӣ дар як маврид хати дифои мизбонон-дастаи «Хуҷанд»-ро рахна карданд. Муаллифи ин гол Наврӯз Рустамов буд.
Бо ҳамин ҳисоб қисми аввали бозӣ анҷом пазируфт. Дар дақиқаи 52-юми бозӣ бозингарони дастаи «Ҳосилот» қоидаи бозиро дағалона вайрон намуданд ва довар зарбаи ҷаримавии 11-метра таъйин намуд. Манучеҳр Аҳмадов тавонист ин ҳолатро ба таври олӣ истифода намуда, имтиёзҳои дастаҳоро баробар кунад. Мизбонон дар дақиқаи 67-ум боз ҳам дар хатти дифоъ ба иштибоҳ роҳ доданд. Аз ин ҳолат Иброҳим Рабимов, бозингари чолоки дастаи «Ҳосилот» истифода карда, тақдири бозиро ҳал намуд. Ҳамин тавр, ҳисоб 2 бар 1 ва бо пирӯзии дастаи футболи «Ҳосилот»-и Фархор анҷом пазируфт.
Ёдрас мешавем, ки ин дастаҳо бозии қаблиро бо ҳисоби 4 бар 2 ба фоидаи дастаи «Ҳосилот» анҷом дода буданд.