Хуҷанд: Фестивали «Оши палав» оғоз шуд

Хуҷанд, 05.10.2016. /АМИТ «Ховар»/. Имрӯз, 5 октябр соати 16.00 дар Маҷмааи таърихию фарҳангии «Қалъаи Хуҷанд» Фестивали «Оши палав» оғоз шуд. Фестивал бо ибтикори мақомоти иҷроияи ҳокимияти давлатии вилояти Суғд тибқи қарори Раиси вилояти Суғд дар маркази маъмурии шимоли кишвар- шаҳри Хуҷанд бори дуввум аст, ки доир мегардад. Тавре аз суҳбат бо чанде аз иштирокчиёни Фестивали «Оши палав» аён гардид, ошпазони моҳир, ки аз тамоми шаҳру ноҳияҳои вилоят иштирок доранд, омодаанд баҳри меҳмонон ва ҳакамони озмун намудҳои гуногуни оши палави миллиро, аз қабили «Оши палав бо биринҷи кенҷа», «Бедона палав», «Оши палав бо равғани зағир ва тухми харбуза», «Оши палав бо қазии гӯшти гӯсола», «Оши палав бо кишмиш», «Оши палав бо тухми бедона», «Оши палав бо биринҷи девзираи Панҷакент», «Оши палав бо гӯшти кабк», «Оши палав бо гӯшти мурғи марҷон»-ро омода ва пешниҳод намоянд. Ҳамзамон дар инъикоси ҷараёни баргузории Фестивал наздик ба 50 нафар хабарнигорони дохиливу хориҷӣ ширкат доранд.
Ба иттилои муовини раиси вилояти Суғд Анвар Яъқубӣ, мақсад аз баргузории Фестивали мазкур- пеш аз ҳама, ташвиқу тарғиби фарҳанги рӯзгордорӣ, эҳё, рушди анъана ва суннатҳои мардумии маҳалҳои гуногуни кишвар, аз қабили тайёрнамоӣ ва муаррифии таомҳои миллӣ, аз ҷумла «Оши палав», ки хӯроки қадимии тоҷикон мебошад, ба ҳисоб меравад. Ҳамчунин дар озмуни имсола се номгӯи нав — бахшҳои саҳнача, намоиши фарҳангӣ ва оростани дастархони миллӣ ҳамроҳ карда шуда, дар ин рӯз дар ҷараёни фестивал дар умум 36 дег гузошта шуда, ошпазони шаҳру ноҳияҳои Исфара, Конибодом, Ҷаббор Расулов ва Истаравшан муаззаф гардидаанд, то дар алоҳидагӣ аз 30 килоӣ биринҷ оши палав омода намуда, онро наздик ба 1,5 ҳазор нафар камбизоат таксим намоянд.
Дар ҷамъбаст барои иштирокчиёни беҳтарин диплому мукофотпулиҳо ба маблағи аз 1000 то 5000 сомонӣ тақдим карда мешаванд.