Мақомоти гумруки Тоҷикистону Ҳиндустон ҳамкориро дар асоси Созишномаи нави ҳамкорӣ тавсеа мебахшанд

Душанбе, 14.10.2016/АМИТ «Ховар»/. Тақвияти ҳамкорӣ дар бахши гумрук байни Тоҷикистон ва Ҳиндустон дар мулоқоти Абдуфатоҳи Ғоиб, сардори Хадамоти гумруки назди Ҳукумати Ҷумҳурии Тоҷикистон ва Сомнатҳ Гош, Сафири Ҷумҳурии Ҳиндустон дар Ҷумҳурии Тоҷикистон баррасӣ гардид.
Абдуфатоҳи Ғоиб афзуд, ки ҳамкории ду кишвар дар бахши гумрук дар асоси Созишномаи байниҳукуматӣ «Дар бораи ҳамкориҳо дар мубориза бо қоҷоқ ва вайронкунии қоидаҳои гумрукӣ, инчунин бо гардиши ғайриқонунии маводи мухадир ва моддаҳои психотропӣ» аз моҳи декабри соли 1999 ба роҳ монда шудааст. Ин заминаи ҳуқуқии ҳамкорӣ шароит фароҳам овард, ки гардиши тиҷорати хориҷӣ байни Тоҷикистон ва Ҳиндустон рушд ёбад. Дар нуҳ моҳи соли равон гардиши тиҷорат байни ду кишвар 18,5 миллион долларро ташкил дод, ки танҳо ба воридот рост меояд. Зикр шуд, ки алҳол аз ҷониби мутахассисон лоиҳаи Созишнома «Дар бораи ҳамкорӣ ва ёрии байниҳамдигарӣ дар фаъолияти гумрукӣ» таҳия гардида, мавриди мувофиқа қарор дорад.
Таъкид гардид, ки мақомоти гумруки Тоҷикистон ҷиҳати таҳкими ҳамкории гумрукӣ бо Ҳиндустон аз тамоми захираву имконоти мавҷуда истифода намуда, заминаи густариши муносиботи тиҷоратию иқтисодии байни ду кишварро фароҳам меоварад.