Рамазон Раҳимзода ва Тоҷмуҳаммад Ҷоҳид масоили мубориза бо ҷинояткориро баррасӣ карданд

Душанбе, 14.10.2016./АМИТ «Ховар»/. Дирӯз вазири корҳои дохилии Ҷумҳурии Тоҷикистон Рамазон Раҳимзода вазири умури дохилии Ҷумҳурии Исломии Афғонистон Тоҷмуҳаммад Ҷоҳидро ба ҳузур пазируфт. Дар вохӯрӣ Сафири Фавқулода ва Мухтори Ҷумҳурии Исломии Афғонистон дар Ҷумҳурии Тоҷикистон доктор Абдулғафур Орзу низ иштирок дошт.
Дар ҷараёни мулоқот зикр гардид, ки «Солҳои охир ҳамкории мақомоти корҳои дохилии ду кишвар дар доираи созишномаҳои дуҷонибаю бисёрҷониба густариш ёфта, дар самтҳои мубориза бо ҷинояткорӣ, гурӯҳҳои муташаккили ҷиноятпеша ва муомилоти ғайриқонунии воситаҳои нашъадор ба рушди фаъолонаи ҳамкорӣ миёни вазоратҳои корҳои дохилии Тоҷикистону Афғонистон мусоидат менамоянд».
Тоҷмуҳаммад Ҷоҳид иброз дошт, ки ҷониби Вазорати умури дохилии Афғонистон ҳамеша омодаанд бо ҳамкорони кишвари дӯсту ҳамсояи Тоҷикистон муносибатҳои дӯстонаи худро дар ҳама самтҳои дахлдор боз ҳам густариш диҳанд.
Ҷонибҳо масъалаҳои мубориза бо ҷинояткорӣ, алалхусус ҷиноятҳои фаромиллӣ ва муташаккил, аз қабили терроризм, экстремизм, гардиши ғайриқонунии маводи нашъадор, силоҳ, савдои одамон, инчунин дар самтҳои мубодилаи таҷрибаи корӣ миёни кормандони ду ниҳод, мубодилаи иттилоот, ҳамкории наздисарҳадӣ ва дигар мавзӯъҳои мавриди таваҷҷуҳро баррасӣ намуданд.
Дар ин бора аз Вазорати корҳои дохилӣ ба АМИТ «Ховар» хабар доданд.