Семинари омўзишӣ оид ба қоидаҳои имлои нави забони тоҷикӣ ва тафсири вожаҳо дар Донишкадаи сохибкорӣ ва хизмат

Душанбе, 01.09.2016. /АМИТ«Ховар»/. Дар остонаи таҷлили Рӯзи забони давлатӣ бо ибтикори Шўрои олимони Донишкадаи соҳибкорӣ ва хизмат семинари омўзишӣ оид ба қоидаҳои имлои нави забони тоҷикӣ ва навишти У бар ивази Ӯ пеш аз ҳарфи Ҳ ва Ъ бо тафсири вожаҳо баргузор гардид.
Ҳадафи семинар шинос намудани устодону кормандони донишкада бо имлои нав, дар заминаи он фаъолият намудани устодони донишкада ва ба ин васила арҷ гузоштан ба забони давлатӣ буд.
Дар семинар профессори кафедраи фарҳанги соҳибкорӣ ва забони донишкада К. Хоҷаев оид ба татбиқи амалии Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», муқаррароти забон, риояи имлои забон дар раванди баргузории машғулиятҳо изҳори андеша намуд. Мавсуф таъкид намуд, ки устодон ҳангоми гузаронидани дарс ва чопи дастуру мақолаҳои илмии хеш бояд ба хатогӣ роҳ надиҳанд ва нисбат ба тозаю беолоиш нигоҳ доштани забони модарӣ бемасъулият набошанд.
Воқеан, забони илм забони давлатӣ аст ва дар тоза нигоҳ доштани забони давлатӣ саҳми бевоситаи кормандони соҳаи илм бояд назаррас бошад.
Мудири кафедраи фарҳанги соҳибкорӣ ва забон А. Ҳайдаров дар мавриди навишти калимаҳои арабӣ ва истифодаи он дар забони точикӣ, инчунин вобаста ба имлои нави забони тоҷикӣ-тағйир ёфтани мавқеи ҳарфҳои У ва Ӯ пеш аз ҳарфи Ҳ ва Ъ андешаҳои хешро иброз дошт. Иштирокдорон бо пешниҳоду мулоҳизаҳои судманд баргузории семинарро дар рушди минбаъдаи забони миллӣ саривақтӣ ва зарур арзёбӣ намуданд.