Либоси миллӣ ҳам нишонаи ифтихори миллист
![](https://khovar.tj/wp-content/uploads/2016/11/Natsodezhda.jpg)
Душанбе, 04.11.2016 /АМИТ «Ховар»/. Оид ба дастовардҳои 25 соли кишвар, арҷгузорӣ ба суннату арзишҳои фарҳанги миллӣ ва ниёгон дар вохӯрии муштараки Кумитаи кор бо занон ва оилаи назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар Донишгоҳи аграрии Тоҷикистон бо ширкати зиёда аз 300 нафар сухан рафт.
Тавре ки аз Кумитаи кор бо занон ва оилаи назди Ҳукумати Ҷумҳурии Тоҷикистон иттилоъ доданд, дар вохӯрӣ ҳамчунин оид ба либоси миллӣ чун нишонаи ифтихори миллӣ, пешгирии тақлидкории занон зимни пӯшидани либоси бегона, даст задан ба корҳои номатлуб, шомилшавии ҷавонон, бахусус занону духтарон ба гурӯҳҳои ифротӣ, мавқеъ ва манзалати занон ва дигар масъалаҳои мубрами рӯз баррасӣ гардиданд.
Ба иттилои манбаъ, чунин вохӯриҳо дар донишгоҳ ва донишкадаҳои дигар идома доранд.