Сафири Фавқулода ва Мухтори Конфедератсияи Швейтсария дар Ҷумҳурии Тоҷикистон: «Ҳамкории Конфедератсияи Швейтсария бо Тоҷикистон зиёда аз 20 сол боз идома дорад»

Душанбе, 22.11.2016 /АМИТ «Ховар»/. «Ҳамкории Конфедератсияи Швейтсария бо Ҷумҳурии Тоҷикистон тӯли зиёда аз 20 сол идома дорад, ва дар ин росто мо тавонистем дӯстии байни мардумони ду кишварро қавитар гардонем»,-иброз дошт имрӯз зимни нишасти хабарӣ Сафири Фавқулода ва Мухтори Конфедератсияи Швейтсария дар Ҷумҳурии Тоҷикистон Урс Шмид пас аз супоридани эътимоднома ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон.
Ба гуфти Урс Шмид, ҳамкории Швейтсария ва Тоҷикистон дар соҳаи молия, бахусус байни бонкҳои миллӣ ва вазоратҳои иқтисодӣ хеле назаррас мебошад.
«Конфедератсияи Швейтсария тавонист барои ворид шудани Тоҷикистон ба Созмони Умумиҷаҳонии Савдо кумаки худро расонад»,- таъкид намуд Урс Шмид.
Инчунин Сафири Конфедератсияи Швейтсария иброз намуд, ки дар доираи ду даҳсолаи охир ҷониби Швейтсария зиёда аз 200 млн доллар маблағ пешниҳод намуд, ки ин барои кумак расонидан ба Ҳукумати Тоҷикистон ҷиҳати рушди кишвар равона гардидааст.
Сафири Швейтсария таъкид намуд, ки ҳамкорӣ бо Тоҷикистон инчунин дар самти дастрасӣ ба оби нӯшокӣ ва хизматрасониҳои баландсифати тиббӣ идома доранд.
Дар бахши хусусӣ низ лоиҳаҳо тарҳрезӣ ва амалӣ шуда истодаанд.