Бозии аввалини таҷрибавии «Ҳосилот»-и Фархор бо КМВА «Помир» бо ғалаба анҷом ёфт

ДУШАНБЕ, 26.12.2016 /АМИТ «Ховар»/. Дар доираи омодагӣ ба мавсими нави футбол ва Ҷоми Конфедератсияи футболи Осиё дастаи «Ҳосилот»-и Фархор дар майдони сеюми Варзишгоҳи марказии ҷумҳуриявӣ бо КМВА «Помир» бозии таҷрибавӣ барпо карда, бо натиҷаи 2:0 ғолиб омад. Дар қисми дуюми бозӣ дар дақиқаи 47-ум собиқ бозингари КМВА «Помир» Шодибек Ғаффоров, ки ҳоло дар ҳайати дастаи «Ҳосилот» ҳунарнамоӣ дорад, ҳисобро боз кард. Баъди 28 дақиқа муҳофизатгари «Помир» Фурӯғ Қодиров бо автоголаш ҳисобро тағйир дод ва дастпарварони Муҳаммадҷон Ҳабибуллоев бо ҳисоби 2:0 ғалаба карданд.
Дар идомаи тайёриҳо «Ҳосилот» 27 декабр бо чемпиони Тоҷикистон- «Истиқлол»-и Душанбе бозии дуюми таҷрибавӣ ва санҷишии худро барпо мекунад. Оғози вохӯрӣ дар соати 12:00.
«Хосилот» дар вохӯрӣ бо КМВА «Помир» бо чунин ҳайат ба майдон омад.
Рустам Ризоев (Фатҳулло Бобоев, 46), Мусо Содиқ, Ойбек Абдуғаффоров (Агблей Джонес, 65), Ҳасан Рустамов, Сафаралӣ Каримов (Фаррух Фузайлов, 72), Абдусамад Хоҷибоев (Бахтиёр Қаландаров, 46), Муҳаммадҷони Ҳасан (Саидалии Сафаралӣ, 70), Ҳикматулло Расулов (Акуффо Гершон, 52), Сайриддин Ғаффоров (Хайрулло Азизов, 46), Иброҳим Рабимов, Абдурасул Раҳмонов (Шодибек Ғаффоров, 46).