Дар вилояти Суғд 42 чемпионат ва мусобиқаҳои мухталифи варзишӣ доир гаштанд

ДУШАНБЕ, 24.12.2016. /АМИТ «Ховар»/. Дар ёздаҳ моҳи соли равон дар вилояти Суғд 42 чемпионат ва мусобиқаҳои мухталифи вилоятӣ аз рӯи намудҳои гуногуни варзишӣ гузаронида шуданд, хабар медиҳад хадамоти матбуоти раиси вилояти Суғд.
Аз ин миқдор дар самти варзиши касбӣ 37 адад ва дар самти варзиши оммавӣ 5 адад чорабиниҳои варзишӣ гузаронида шуданд. Дар мусобиқаҳои касбӣ 6367 ҷавонону наврасон, аз ҷумла 737 духтарон иштирок намуданд.
Инчунин мусобиқаҳои оммавӣ бо ҷалби 147 320 нафар ҷавонону наврасон ва шаҳрвандони касбу кори гуногун гузаронида шуд, ки аз ин шумора 47343 нафар иштирокчиёнро занону духтарон ташкил медиҳанд. Дар моҳҳои январ-ноябри соли 2016 баҳри рушду нумӯи соҳаи ҷавонон, варзиш ва сайёҳӣ аз ҷониби мақомоти иҷроияи ҳокимияти давлатии вилоят тадбирҳои зиёд андешида шуданд.
Инчунин, 2 929 нафар аъзои дастаҳои яккачини вилоят, аз ҷумлаи 390 нафар бонувон аз рӯи намудҳои гуногуни варзиш дар 75 мусобиқаҳои сатҳашон гуногуни ҷумҳуриявӣ иштирок намуда, соҳиби 444 медали тилло, 459 медали нуқра ва 518 медали биринҷӣ гардиданд.
Ҳайати 212 нафараи варзишгарони вилоят, аз ҷумла 21 нафар бонувон дар ҳайати тими Тоҷикистон дар 42 мусобиқаҳои сатҳи мухталифи ҷаҳонӣ ширкат варзида, шарафи варзиши тоҷикро дар арсаи ҷаҳонӣ баланд бардоштанд. Яккачини варзишгарони вилоят дар ҳайати тими Тоҷикистон барои гирифтани 24 медали тилло, 41 медали нуқра ва 39 медали биринҷӣ шарафёб гардиданд.