Мактабҳои ВМКБ ба низоми нави таълими салоҳиятнок омода мешаванд

ХОРУҒ, 15.12.2016 /АМИТ Ховар/. Дар толори муассисаи давлатии Мактаби президентии шаҳри Хоруғ машварати директорони таълимгоҳҳои ВМКБ оид ба роҳҳои густариши низоми нави таълими салоҳиятнок баргузор гардид. Дар ин бора хабарнигори АМИТ «Ховар» аз вилоят хабар дод.
Амалӣ намудани низомномаро Филиали ҷумҳуриявии Донишкадаи такмили маълумоти касбӣ ва бозомӯзии омӯзгорони вилоят бар дӯш дорад. Мудири кафедраи Донишкадаи мазкур Ғуломносир Қурбонов зимни ифтитоҳи машварат гуфт, ки «қабл аз татбиқи ин низомнома дар марҳилаи аввал 41 муассисаи таълимиро дар маркази ноҳияҳо ва ҷамоатҳо интихоб намудем. Барои омӯзгорони ин таълимгоҳҳо 79 семинару омӯзишҳо баргузор карда шуд, ки дар он наздики ду ҳазор омӯзгорон ширкат намуданд. Мутобиқи шароит бо дастгирии Вазорати маорифи ҷумҳурӣ синфхонаҳо бо асбобҳои аёнӣ ва таҷҳизоти техникӣ муҷаҳҳаз гардонида шуданд».
«Яке аз ҳадафҳои асосии низомномаи нави таълими салоҳиятнок ба ҳаёт наздик намудани таълим мебошад. Агар фанҳои дақиқ бо истифода аз асбобҳои аёнӣ гузаранд, ҳам дарс шавоқовару ҷолиб ҷараён мегирад ва хонандагон мавзӯъро ҳамаҷониба аз худ мекунанд. Бинобар ин мувофиқи як қарордод байни Вазорати маориф ва илми ҷумҳурӣ ва Хадамоти маорифи Бунёди Оғохон то соли 2020 даҳ синфхонаи методиро бо таҷҳизоти техникӣ таъмин мекунанд. Барои таъмини як синфхона бештар аз 70 ҳазор сомонӣ сарф мешавад»,-зикр кард манбаъ.