ВМКБ: Осудагии Ватан мароми мост

Душанбе, 02.12.2016 /АМИТ «Ховар»/. Ба хотири пешгирии хатарҳои муосири ҷомеа ва зуҳуроти номатлуб, аз қабили терроризм ва экстремизм, пешгирии шомилшавии ҷавонон ба гурӯҳҳои тундрави ифротӣ дар мақомоти иҷроияи ҳокимияти давлатии ноҳияи Шуғнон вохӯрии роҳбарияти РВКД ва Раёсати Кумитаи давлатии амнияти миллии Ҷумҳурии Тоҷикистон дар ВМКБ бо сокинон, халифаҳо, ҷавонон ва фаъолони ноҳия баргузор гардид.
Тавре аз Раёсати Вазорати корҳои дохилии ҶТ иттилоъ доданд, сардори РВКД дар ВМКБ полковники милитсия Абдулваҳоб Искандарзода оид ба вазъи ҷинояткорӣ дар вилоят ва ноҳияи Шуғнон, ки бо Ҷумҳурии Исломии Афғонистон ҳамсарҳад аст, маълумот дода, чунин зикр кард: «Вазъияти сиёсии имрӯзаи ҷаҳон ягон кишварро бе таъсир намегузорад. Дар ин самт ҳар яки мо бояд дар пешгирии шомилшавии шаҳрвандон, махсусан ҷавонон ба ҳар гуна гурӯҳҳои ифротӣ саҳмгузор бошем. Ин хатари замони муосир ба кулли ҷомеа таҳдид менамояд, аз ин рӯ аз волидон, масъулини муассисаҳои таълимӣ, намояндагони дин ва аҳли ҷамоат бояд ҳамкориро бо мақомоти ҳифзи ҳуқуқ ва сохторҳои қудратӣ мустаҳкам намоянд».
Дар вохӯрӣ инчунин сардори раёсати КДАМ Ҷумҳурии Тоҷикистон дар ВМКБ Нусратулло Мирзоев дар мавзӯи мубориза бо гурӯҳҳои террористӣ-экстремистӣ ва муомилоти ғайриқонунии маводи мухаддир, ки ҷавонони ноогоҳ бештар ба ин амалҳои зишт даст мезананд, ибрози андеша намуд.