Дар Донишкадаи идоракунии давлатӣ аз соли таҳсили 2017-2018 таҳсили дуҷониба ба роҳ монда мешавад

ДУШАНБЕ, 26.01.2017 /АМИТ «Ховар»/. Имрӯз, 26 январ дар Маркази матбуоти ҷумҳуриявии АМИТ «Ховар» нишасти матбуотии Донишкадаи идоракунии давлатии назди Президенти Ҷумҳурии Тоҷикистон баргузор гардид. Дар ин бора хабарнигори АМИТ «Ховар» хабар медиҳад.
Лутфия Абдулхолиқзода, ректори донишкадаи мазкур иброз дошт, ки соли 2016 бори аввал конференсияи илмию амалии байналмилалии муштараки Донишкадаи идоракунии давлатии назди Президенти Ҷумҳурии Тоҷикистон бо Академияи идоракунии назди Президенти Ҷумҳурии Беларус дар реҷаи on Line гузаронида шуд. Ин имкон медиҳад, ки ҳамкории донишкада бо муассисаҳои ҳамсони кишварҳои дигар боз ҳам вусъат ёфта, аз таҷрибаи ҳамдигар барои пешравиҳо истифода намоем.
«Дар шаҳри Москваи Федератсияи Россия аввалин ҳамоиши байналмилалии шӯрои ҳамоҳангсозии ҷамъиятии Иттиҳоди давлатҳои Мустақил баргузор гардид, ки Лутфия Абдулхолиқзода узви ин Шўро интихоб гардидааст. Дар он намояндагон аз академияҳо ва институтҳои идоракунии давлатии кишварҳои дигари ИДМ ҳузур доштанд. Бисёр масъалаҳои мубрами рӯз барои пешбурди фаъолият дар самти тайёр намудани кадрҳои баландихтисоси соҳаи идоракунии давлатӣ ва хизмати давлатӣ мавриди баррасӣ қарор гирифтанд»,- гуфт ректори донишкада.
Тавре Лутфия Абдулхолиқзода иброз намуд, ки дар ҷаласаи мазкур қарор қабул карда шуд, ки вобаста ба тайёр намудани кадрҳои баландихтисос дар якҷоягӣ бо ин давлатҳо корҳо шурӯъ мешгаванд.
«Дар ҷаласаи якуми Шўрои ҷамъиятӣ ман ҳамчун намояндаи Тоҷикистон иштирок намуда, масъалаҳои афзалиятнокро дар соҳаҳои барои иштирокчиён муҳим пешниҳод намудам, ки яке аз онҳо гирифтани дипломи дутарафа аст. Дар ин ҳол магистрантон қисми барномаи таълимиро дар кишвари худ ва қисми дигарашро дар кишвари дигар аз худ менамоянд. Ҳангоми ба охир расонидани магистратура ё зинаи бакалавриат ба онҳо дипломи дутарафа дода мешавад. Тамоми пешниҳодҳо дар қарори протоколи ҷаласаи аввалини Шўро инъикос ёфта, он аз соли таҳсили 2017-2018 дар доираи ҳамкорӣ ба роҳ монда мешаванд»,-гуфт ректори донишкада.