Дар ноҳияи Мастчоҳ масоили вобаста ба захираҳои оби тозаро баррасӣ карданд

ХУҶАНД, 05.01.2017. /АМИТ «Ховар»/. Дирӯз дар ноҳияи Мастчоҳ бо пуштибонӣ аз иқдоми нави созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълон шудани Даҳсолаи байналмилалии амал «Об барои рушди устувор», барои солҳои 2018-2028 ва дар ин замина аз тарафи раиси вилояти Суғд дар вилоят эълон гардидани Соли 2017- соли дастрасии аҳолӣ ба оби тозаи нӯшокӣ таҳти унвони «Об- манбаи ҳаёт» ҷамъомад доир гардид.
Тавре аз шуъбаи ташкилии мақомоти иҷроияи ҳокимияти давлатии ноҳия ба хабарнигори АМИТ Ховар иттилоъ доданд, ҷамъомад бо иштироки намояндагони мақомоти маҳалии ноҳия, кумитаи иҷроия ва ҷавонони фаъол доир гардида, ҳадафи он татбиқи дастуру супоришҳои Сарвари давлат, истифодаи дурусту самараноки оби нӯшокӣ, огаҳӣ ёфтан аз масоили ҷаҳонии захираҳои оби тоза, расидан ба қадри ин манбаи ҳаёт, инчунин таҳкими дӯстиву рафоқат ва сулҳу ваҳдати миллӣ буд.