Дар Тоҷикистон Бюрои миллии хизматрасонӣ барои содиркунандагон фаъолият дорад

ДУШАНБЕ, 11.01.2017. /АМИТ «Ховар»/.  Дар шароити узвияти Созмони Умумиҷаҳонии Савдо, Палатаи савдо ва саноати Ҷумҳурии Тоҷикистон ба ширкаткунандагони муносиботи иқтисодии хориҷӣ дар гузаронидани ташхиси мустақил, баҳо додани сифати маҳсулот, ба даст овардани иттилои муфид, машварати ҳуқуқӣ, пайдо намудани шарикони ҳамкор ва сармоягузорон, барқарор намудани робитаҳои тиҷоратӣ, сохтани корхонаҳои муштарак, гузаронидани муаррифиҳо, суҳбатҳо, тренингҳо ва семинарҳо мусоидат менамояд. Дар ин бора 11 январ  зимни нишасти матбуотӣ Раиси Палатаи савдо ва саноати Тоҷикистон Шариф Саид изҳори ақида намуд.
Мавсуф иброз дошт, ки бо мақсади амалисозии уҳдадориҳои қабулнамудаи Ҷумҳурии Тоҷикистон дар чорчӯбаи Созишнома оид ба равандҳои содагардонии тиҷорат ва иҷрои барномаи рушди иқтидори содиротии Ҷумҳурии Тоҷикистон, ки аз тарафи Ҳукумати Ҷумҳурии Тоҷикистон қабул шудааст, дар назди ПСС Ҷумҳурии Тоҷикистон Бюрои миллии хизматрасонӣ барои содиркунандагони Ҷумҳурии Тоҷикистон, инчунин марказҳо оид ба пешбурди тиҷорат дар Душанбе, вилояти Хатлон ва вилояти Суғд фаъолият менамоянд.