Донишкадаи соҳибкорӣ ва хизмати Тоҷикистон дорои неруи баланди зеҳнӣ мебошад

ДУШАНБЕ, 20.01.2017 /АМИТ «Ховар»/. Донишкадаи соҳибкорӣ ва хизмати Тоҷикистон дорои неруи баланди зеҳнӣ буда, қариб 40 фоизи устодони он соҳиби унвонҳои илмӣ мебошанд. Ин нуктаро Диловар Қодирзода, Ректори Донишкадаи соҳибкорӣ ва хизмати Тоҷикистон зимни нишасти матбуотии ин ниҳод баён дошт. Мавсуф гуфт: «Аз 151 нафар устодони донишкада 6 нафар доктори илм ва 53 нафар номзади илм мебошанд, ки ин барои беҳтар кардани сифати таҳсил дар донишкада шароит муҳайё месозад».
Раёсати донишкада ба сифати таълим диққати ҷиддӣ дода, гузариш аз миқдор ба сифатро ба таври шоиста амалӣ месозад. Дар ин самт зарур аст, ки назорати қатъии сифати таълим ва алоқамандии сифати таълим бо натиҷаҳои таҳсилот, баҳодиҳии сатҳи иҷрои барномаҳои таълимӣ ва истифодаи самараноки технологияҳои иттилоотию коммуникатсионӣ дар раванди таълим ҷоннок карда шавад.
«Яке аз вазифаҳои дигаре, ки дар самти беҳтар намудани сифати таҳсилот бояд амалӣ гардад, ин гузариш ба таҳсилоти фосилавӣ аст. Аз соли хониши 2017-2018 дар шуъбаи ғоибона мо ба ин низом мегузарем»,-гуфт Диловар Қодирзода.