Фарогирии 100 нафар маорифчиён ба истироҳату табобати ройгон

ДУШАНБЕ, 19.01.2017. /АМИТ «Ховар»/. Соли сеюм аст, ки бо иқдоми Мақомоти иҷроияи ҳокимияти давлатии вилояти Суғд дар таътили тобистона ва зимистона омӯзгорони пешқадаму ботаҷриба ва собиқадорони соҳаи маорифи шаҳру нохияҳои вилоят бо истироҳат ва табобати ройгон фаро гирифта мешаванд. Дар ин бора аз хадамоти матбуоти Раиси вилояти Суғд хабар доданд.
16 январ марҳилаи аввали табобату истироҳати маорифчиён дар КВД «Осоишгоҳи шифо»-и шаҳри Гулистон бо фарогирии 57 нафар кормандони соҳаи маориф оғоз ёфт. Тибқи нақша 23 январ боз 43 нафар омӯзгорону собиқадорон бо истироҳат ва табобати ройгон фаро гирифта мешаванд.
Айни замон дар осоишгоҳ бо дастгирии Мақомоти иҷроияи ҳокимияти давлатии шаҳри Гулистон 20 нафар омӯзгорон таътили зимистонаи худро гузаронида истодаанд.
Ин иқдомҳои шоиста боиси қаноатмандию сарфарозии маорифчиён гардида, онҳо тасмим гирифтаанд ба ин ғамхориҳо бо меҳнати фидокорона ҷавоб гӯянд.