И. Қосимзода: «Масъалаи ҷалби занон ба вазифаҳои роҳбарикунанда дар муассисаҳои бонкӣ, хадамоти алоқа, шуғл ва дигар бахшҳо дар мадди назари мо қарор дорад»

ДУШАНБЕ, 17.012017 /АМИТ Ховар/. Таҳти  роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Идигул Қосимзода ва муовини Раиси Кумита Зулфия Давлатзода ҷиҳати бурдани корҳои таблиғотию ташвиқотӣ оид ба Паёми Асосгузори сулҳу Ваҳдати миллӣ — Пешвои миллат муҳтарам Эмомалӣ Раҳмон ба Маҷлиси Олӣ дар маҳаллаҳои шаҳри Хоруғ ва ҷамоатҳои деҳоти ноҳияи Ишкошим бо шаҳрвандон мулоқотҳо доир шуданд.
Идигул Қосимзода зимни мулоқот оид  ба самтҳои асосии сиёсати дохилӣ ва хориҷӣ, рушди иқтисодӣ ва иҷтимоии кишвар, ки барои солҳои минбаъда дар Паёми Роҳбари давлат муайян гардидаанд, ибрози ақида намуд. Дар қатори дигар нуктаҳои Паёми Пешвои миллат таъкид гардид, ки дар давраи соҳибистиқлолӣ  дастгирии занону духтарон зиёд шуда, нисбат ба ин масъала аз ҷониби Кумитаи кор бо занон ва оила тадбирҳои ҷиддӣ андешида мешаванд.
«Масъалаи  ҷалби занон, хусусан ҷавондухтарон ба вазифаҳои роҳбарикунанда дар муассисаҳои низоми бонкӣ, хадамоти алоқа, шуғл ва дигар бахшҳои хизматрасонӣ аз масъалаҳои муҳим буда, дар мадди назари мо қарор дорад. Барои дастгирии занону духтарон дар оянда квота ва имтиёзҳо муқаррар карда мешаванд, ки ин боз ҳам рӯҳияи занону ҷавондухтаронро баланд мебардорад»,- иброз дошт Раиси Кумитаи кор бо занон ва оилаи назди Ҳукумати Ҷумҳурии Тоҷикистон зимни мулоқот.