Игор Черевченко: «Барои аз «Локомотив» рафтанам пушаймон нестам»

ДУШАНБЕ, 24.01.2017/АМИТ «Ховар»/. Собиқ бозингари дастаи «Помир»-и Душанбе ва дастаи мунтахаби Тоҷикистон Игор Черевченко, ки вазифаи сармураббигии дастаи «Локомотив»-и Москваро пештар ба уҳда дошт, дар мусоҳибаи телевизионӣ (Россия-24) баён кардааст, ки аз қарори тарк кардани мансабаш пушаймон нест. Аз рӯи суханони ӯ дигар роҳи ин масъала вуҷуд надошт.
«Вақте ки давраи омодагиро мегузаронидем, аз роҳбарият ягон хабар набуд, иттилои телефонӣ ҳатто намерасид. Намедонистам, ки ба чемпионат чӣ гуна тайёр шавем. Даста дар ҳолати номуайянӣ қарор дошт, аз ин рӯ ман қарори аз даста рафтанамро хуб дарк кардам», — овардааст «Спорт Экспресс» бо истинод ба ТВ «Россия 24».
Игор Черевченко дастпарвари футболи Тоҷикистон буда, дар ҳайати дастаҳои «Помир»-и Душанбе, «Локомотив», «Торпедо» ва Алания»-и Россия бозӣ кардааст. Дар ҳайати дастаи мунтахаби Тоҷикистон 8 вохӯрӣ гузаронидааст. Аз соли 2008 то 2015 дар вазифаи мураббӣ ва аз соли 2015 дар вазифаи сармураббии дастаи «Локомотив» фаъолият кардааст. Дар таърихи футболи Россия ягона шахсе мебошад, ки ҳамчун бозингар ва мураббӣ соҳиби Ҷоми Россия гардидааст.