КИ ҲХДТ Шоҳмансур: Вакилон нуктаҳои Паёми Пешвои миллатро ба интихобкунандагон шарҳ медиҳанд

ДУШАНБЕ, 13.01.2017. /АМИТ Ховар/. Бо ташаббуси Кумитаи иҷроияи ҲХДТ дар ноҳияи Шоҳмансур  вохӯриҳои вакилон  бо интихобкунандагон бобати  шарҳи нуктаҳои Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон  идома доранд.
Дар ин бора  Ҷӯрабек Муродов, мудири  шуъбаи  таблиғот ва иттилооти  КИ ҲХДТ дар ноҳияи Шоҳмансур иттилоъ дода, зикр кард, ки Баҳром Абдуалимов, Лутфия Раҷабова,  вакилони Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии Шоҳмансур № 3 дар якҷоягӣ бо  олимону устодони макотиби олии кишвар дар ҳудуди шаҳраку маҳаллаҳои ноҳияи Шоҳмансур  бо интихобкунандагон   мулоқот намуданд.
Иштирокдорон асосан атрофи Паёми имсолаи  Асосгузори сулҳу Ваҳдати миллӣ, Пешвои миллат, Президенти кишвар  муҳтарам Эмомалӣ Раҳмон сухан гуфта,  таъкид карданд,  ки Паёми Пешвои миллат  тоҷикистониёнро баҳри ворид гардидан   ба марҳалаи нави рушди кишвар раҳнамун сохта,  ҳар яки моро  вазифадор менамояд, ки  барои  ояндаи дурахшони Тоҷикистони соҳибистиқлол саҳмгузор бошем.