«Паём- роҳнамои имрӯзу фардо»- ҳамоиш дар вилояти Суғд

ХУҶАНД,  14.01.2017 /АМИТ  «Ховар»/.   Дар Кохи фарҳанги ба номи Абӯабдуллоҳ Рӯдакии шаҳри Хуҷанд бо иштироки  беш аз 700 нафар омӯзгорони шаҳру навоҳии вилояти Суғд, хатмкардагони  курсҳои бозомӯзии филиали Донишкадаи такмили ихтисос ва бозомӯзии кормандони соҳаи маориф  таҳти унвони «Паём- роҳнамои имрӯзу фардо» ҳамоиш доир гардид.

Сардори раёсати маорифи вилоят Осим Каримзода фаъолияти  соҳаи маорифи вилоятро  дар партави  нуктаҳои  Паёми навбатии  Асосгузори сулҳу Ваҳдати миллӣ, Пешвои миллат, Президенти Ҷумҳурии  Тоҷикистон муҳтарам Эмомалӣ Раҳмон ба  Маҷлиси Олии Ҷумҳурии Тоҷикистон  шарҳ дод. Мавсуф гуфт, ки нишондиҳандаҳои  ба зинаи сеюми таҳсилот фарогирии хатмкунандагони синфи 9, қабули хатмкунандагони муассисаҳои таҳсилоти миёнаи умумӣ ба мактабҳои олӣ аз тариқи Маркази миллии тестӣ  хурсандибахшанд.

Номбурда ҳамзамон аз камбудию норасоиҳои соҳа ҳарф зада, таъкид намуд, ки дар қиёс ба солҳои пешин шумораи ғолибони олимпиадаҳо дар аксар шаҳру навоҳӣ кам ба чашм мерасад.

Дар ҷамъомад омӯзгорони шаҳру ноҳияҳои вилояти Суғд иброз доштанд, ки  аз Паёми навбатии Сарвари давлат рӯҳу илҳоми тоза гирифта, дар партави он содиқона адои вазифа мекунанд.