«Паём-роҳнамои имрўзу фардо»-ҳамоиш дар Китобхонаи миллии Тоҷикистон

ДУШАНБЕ, 18.01.2017 /АМИТ Ховар/. Дирӯз дар Китобхонаи миллии Тоҷикистон (КМТ) дар ҳошияи Паёми Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон таҳти унвони «Паём-роҳнамои имрўзу фардо» ҳамоиш баргузор гардид. Дар ин бора аз Китобхонаи миллии Тоҷикистон хабар доданд.
Гадобек Маҳмудов, муовини директори КМТ зимни ҳамоиш гуфт: «Мо мардуми тоҷик бояд Паёмро сармашқи зиндагии хеш қарор дода, онро барои худ ҳамчун дастурамал истифода барем. Паёми Пешвои миллат, пеш аз ҳама, тамоми паҳлўҳои сиёсати дохилӣ ва хориҷии кишварро баррасӣ намуд. Бояд гўем, ки ҳар Паём дар худ навовариҳо дорад».
Салима Раҷабова, муовини Директори Китобхонаи миллии Тоҷикистон дар мавриди баланд бардоштани нақши занон дар ҷомеа иброз намуд, ки як нуктаи асосии Паёми имсолаи Сарвари давлат боз ҳам дар бобати баланд бардоштани мавқеи занону бонувон дар ҷомеа буд.
«Сарвари давлат ба ин масъала хеле бархӯрди ҷиддӣ доранд ва солҳост, ки ин нукта дар ҳар суханронии Пешвои миллат таъкид мешавад. Воқеан бубинед, сол то сол теъдоди занон дар корҳои давлатӣ зиёд гардида истодааст. Зиёда аз 70 дарсади кормандони Китобхонаи миллиро бонувон ташкил медиҳанд ва ин боиси ифтихор аст»,- илова намуд Салима Раҷабова.