Раиси Кумитаи андоз: «Нақшаи андози иҷтимоӣ аз ҳисоби корхонаҳои ғайрибуҷетӣ дар давраи ҳисоботӣ таъмин нашуд»

ДУШАНБЕ, 20.01.2017. /АМИТ «Ховар»/. Нақшаи андози иҷтимоӣ аз ҳисоби корхонаҳои ғайрибуҷетӣ дар давраи ҳисоботӣ 89,1% таъмин карда шуд. Дар натиҷа ба ҷойи 1 млрд. 550 млн. сомонии пешбинишуда ба буҷети Агентии суғуртаи иҷтимоӣ ва нафақа 1 млрд. 381 млн. сомонӣ ворид карда шуд, ки нисбат ба нақша 169 млн. сомонӣ кам мебошад. Ин суханонро имрӯз зимни нишасти матбуотии ин ниҳод раиси Кумитаи андози назди Ҳукумати Ҷумҳурии Тоҷикистон Нусратулло Давлатзода ба хабарнигорон баён дошт.
Раиси Кумита сабабҳои асосии таъмин нагардидани иҷрои нақшаи андози иҷтимоӣ аз ҳисоби корхонаҳои ғайрибуҷетиро дар соли 2016 ба таъсири буҳрони ҷаҳонии иқтисодӣ, вобаста ба он ногувор гардидани шароити молиявии андозсупорандагон, кам афзоиш ёфтани музди меҳнат дар як қатор корхонаҳо ва дар баъзе корхонаҳо ва кам шудани шумораи коргарон нисбат дод.
Зикр шуд, ки дар соли 2016 нақшаи андозҳо ва пардохтҳои ҳатмӣ, бе назардошти андози иҷтимоии ғайрибуҷетӣ ба андозаи 101,0 фоиз таъмин карда шуда, ба ҷойи 6 млрд. 985,4 млн. сомонӣ ба буҷет зиёда аз 7 млрд. 53,0 млн. сомонӣ ворид карда шуд, ки нисбат ба нақшаи пешбинишуда 67,6 млн. сомонӣ зиёд мебошад.