Шералӣ Ҷононов бо Муҳаммад Ашраф маҷмӯи масъалаҳо оид ба истифодаи захираҳои обро муҳокима карданд

ДУШАНБЕ, 11.01.2017 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Ҷумҳурии Исломии Покистон Шералӣ Ҷононов 10 январ  бо Раиси Шӯрои Ҷумҳурии Исломии Покистон оид ба омӯзиши захираҳои об, профессор Муҳаммад Ашраф мулоқот намуд. Дар мулоқот маҷмӯи масъалаҳо оид ба истифодаи захираҳои об муҳокима гардиданд.
Тавре аз Вазорати корҳои хориҷии Ҷумҳурии Тоҷикистон хабар доданд, профессор Муҳаммад Ашраф изҳор намуд, ки Покистон аз ҷониби Маҷмаи Умумии СММ қабул гардидани Қатънома оид ба эълони Даҳсолаи байналмилалии амал «Об барои рушди устувор», солҳои 2018-2028-ро, ки ташаббуси Асосгузори сулҳу Ваҳдати миллӣПешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад, истиқбол менамояд. Таъкид гардид, ки ташаббуси мазкур ба пешрафти соҳаи дипломатияи об мусоидат карда, дар шароити ҷаҳонишавӣ ҳамчун заминаи устувор дар ҳалли масъалаи истифодаи оқилонаи захираҳои об хидмат хоҳад кард.
Ҷонибҳо инчунин ҷиҳати тавсеаи ҳамкорӣ бо мақсади ширкати муштарак дар татбиқи даҳсолаи мазкур изҳори омодагӣ намуданд.