Шукурҷон Зуҳуров ба интихобкунандагон Паёми Пешвои миллатро шарҳ дод

ДУШАНБЕ, 16.01.2017. /АМИТ «Ховар»/. Ҳафтаи гузашта ҷиҳати ташреҳи Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияҳои водии Рашт вохӯрии раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо интихобкунандагон  доир гардид. Дар ин бора масъулини Мақомоти иҷроияи ҳокимияти давлатии ноҳияҳои водии Рашт ба хабарнигори АМИТ «Ховар» иттилоъ доданд.
Дар мулоқотҳо  Шукурҷон Зуҳуров, раиси Маҷлиси намояндагони Маҷлиси Олии кишвар нуктаҳои асосии Паёми Пешвои миллат муҳтарам Эмомалӣ Раҳмонро шарҳ дода, дар мавриди се самти асосии стратегияи миллӣ- таъмини истиқлолияти энергетикӣ, баромадан аз бунбасти коммуникатсионӣ, таъмини амнияти озуқаворӣ сухан ронд. Мавсуф афзуд, ки дар амал татбиқ гардидани се ҳадафи миллӣ имкон фароҳам меоранд, то зиндагии мардум ва вазъи иқтисодии кишвар беҳтар шавад.  Ҳадафи дигари наздиктарини Ҳукумати Ҷумҳурии Тоҷикистон  саноатикунонии мамлакат мебошад, яъне аз кишвари аграрӣ- индустриалӣ ба кишвари индустриалӣ- аграрӣ табдил додани Тоҷикистон аст ва мо ба ин марҳилаи таърихӣ рӯз ба рӯз наздиктар мешавем.