Теъдоди тамошобинони театрҳои кишвар 8 фоиз зиёд шудааст

ДУШАНБЕ, 20.01.2017. /АМИТ «Ховар»/. Имрӯз Вазири фарҳанги Ҷумҳурии Тоҷикистон Шамсиддин Орумбекзода зимни нишасти матбуотии ин ниҳод иброз дошт, ки дар кишвар 18 муассисаи театрии касбӣ фаъолият доранд. Теъдоди тамошобинони театрҳои кишвар дар соли 2016 8 фисад афзудааст. Ба гуфтаи Ш. Орумбекзода, 8 фисад афзудани тамошобинони театрҳои кишвар кам бошад ҳам, мо дар ин самт роҳҳои гуногуни ҷалби тамошобинон ба театрро ҷустуҷӯ дорем.
«Ҳоло дар мамлакат 18 муассисаи театрии касбӣ, 5 муассисаи консертӣ, 95 муассисаи таълимии соҳаи фарҳанг ва санъат, аз ҷумла, 3 мактаби олӣ, 6 коллеҷи санъат, фарҳанг, хореографӣ ва рассомӣ, 2 мактаб- интернати махсуси миёнаи мусиқӣ ва санъати ҷумҳуриявӣ, 84 мактаби бачагонаи мусиқӣ, санъат ва рассомӣ фаъолият доранд»,-илова кард Вазири фарҳанги Ҷумҳурии Тоҷикистон.