ВКД: дар давраи таътили зимистонаи хонандагон амалиёти «Оворагард» гузаронида мешавад

ДУШАНБЕ, 10.01.2017. /АМИТ Ховар/. Барои хонандагони муассисаҳои таҳсилоти умумии ҷумҳурӣ аз 1 то 31 январи соли 2017 таътили зимистона муқаррар гардидааст. Дар бисёр ҳолатҳо мушоҳида мешавад, ки ноболиғон аз рӯзҳои таътили зимистона истифода намуда, ба ҳар гуна амалҳои беҳуда ва ё зараровар машғул мешаванд.
Тибқи иттилои маркази матбуоти Вазорати корҳои дохилии Ҷумҳурии Тоҷикистон бо мақсади ошкору пешгирӣ намудани ҳолатҳои ба талбандагиву оворагардӣ ва дигар аъмоли нолоиқ даст задани насли наврас давоми моҳи январи соли равон дар ҳудуди шаҳри Душанбе амалиёти «Оворагард» гузаронида мешавад. Аз ҷумла, дар рӯзҳои аввали баргузории он аз тарафи кормандони Хадамоти пешгирии ҳуқуқвайронкунӣ дар байни ноболиғон ва ҷавонони ВКД дар ҳудуди ноҳияи Исмоили Сомонии пойтахт ҳолатҳои зиёди машғул шудани ноболиғону ҷавонони беҳудагард ба бозиҳои компютерии дорои хусусияти зӯроварӣ муайяну ошкор шуданд.
Амалиёти мазкур, пеш аз ҳама, бо мақсади таъмини иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» амалӣ карда мешавад.
Зимни амалиёт ҳолатҳои зиёди вайрон намудани талаботи ин қонун аз тарафи волидони ноболиғон ошкор гардид. Аз ҷумла, маълум гардид, ки ноболиғони зиёд рӯзонаву шабона бе назорат дар кӯчаву хиёбонҳо гаштугузор намуда, аксаран ба корҳои зараровар, хусусан ба ҳар гуна бозиҳои компютерӣ, ки боиси ҷой гирифтани рафтору кирдорҳои бадахлоқона ба тафаккури насли наврас мегарданд, машғул мешаванд. Дар бештари маврид маҳз беҳудагардиву дур аз назорати падару модар будани ноболиғон боиси ба роҳи хато рафтани онҳо мегарданд.
Нисбат ба волидони он ноболиғону ҷавононе, ки зимни ин амалиёти пешгирикунанда боздошту ба шуъбаи милитсия дастрас мешаванд, мувофиқи талаботи қонунгузорӣ тадбирҳои таъсирбахш андешида мешаванд.