Заррина Рўзиева «Мураббии соли Тоҷикистон» интихоб гардид

ДУШАНБЕ, 18.01.2017. /АМИТ «Ховар»/. Бо мақсади дарёфт ва интихоби мураббиёни боистеъдоду навовар, эҷодкору ботаҷриба, мусоидат ба рушди фаъолияти кормандони соҳаи таълиму тарбияи томактабӣ, тарғиби таҷрибаи пешқадам, қадрдонии меҳнати мураббиён ва баланд бардоштани мақому манзалати маорифчиён дар ҷомеа аз 10 то 12 январи соли равон дар заминаи Донишкадаи ҷумҳуриявии такмили ихтисос ва бозомӯзии кормандони соҳаи маориф ва муассисаи таҳсилоти томактабии №45-и шаҳри Душанбе даври ҷамъбастии озмуни «Мураббии соли Тоҷикистон» баргузор гардид.
Тавре аз Вазорати маориф ва илми Ҷумҳурии Тоҷикистон хабар доданд, озмуни мазкур аз рӯи 6 шарт, аз ҷумла машғулияти таълимӣ, суҳбат, тасвир ва сохтани манзара, ҳолатҳои равонию педагогӣ ва муаррифии таҷрибаи корӣ доир шуда, дар он 4 нафар ғолибони даври сеюм аз шаҳри Душанбе, вилоятҳои Суғду Хатлон ва шаҳру ноҳияҳои тобеи марказ ширкат варзиданд.
«Заррина Рўзиева, мураббии кўдакистони президентии шаҳри Хуҷанд бо нишондоди аз ҳама баланд ғолиби озмуни «Мураббии соли Тоҷикистон 2016» дониста шуд. Ҳамаи иштирокдорони даври ҷумҳуриявии озмун бо нишони «Аълочии маориф ва илми Тоҷикистон», туҳфаҳои хотиравӣ ва ғолиб бо мукофотпулӣ ба маблағи 2000 сомонӣ сарфароз гардонида шуданд. Инчунин аз ҷониби Кумитаи иттифоқи касабаи кормандони соҳаи маориф ва илми Ҷумҳурии Тоҷикистон ба ҳамаи иштирокдорон туҳфаҳои пулӣ ва роҳхат ба истироҳатгоҳҳо супурда шуданд»,- иттилоъ доданд аз Вазорати маориф ва илми ҷумҳурӣ.