Аз ҷиҳати серобӣ Ҷумҳурии Тоҷикистон дар байни кишварҳои дунё ҷои намоёнро ишғол мекунад

ДУШАНБЕ, 15.02.2017 /АМИТ «Ховар»/. Имрӯз дар факултаи журналистикаи Донишгоҳи миллии Тоҷикистон бахшида ба эълон шудани Даҳсолаи байналмилалии амал «Об барои рушди устувор», солҳои 2018-2028 вохӯрии донишҷӯёну устодон бо Зайналобуддин Кобулиев, доктори илмҳои техникӣ, профессор, директори Институти масъалаҳои об, гидроэнергетика ва экологияи Академияи илмҳои Ҷумҳурии Тоҷикистон доир гардид.
Зимни вохӯрӣ Зайналобуддин Кобулиев иброз дошт, ки дар ҳолати дуруст ба роҳ мондан, баррасӣ кардан, коргузорӣ ва сохторбандии дуруст мо метавонем, ки ба ҳадафи шашуми ин барномаи баландпоя бирасем. Дар ҳадафи шашум омадааст, ки дастрасии ҳамагон ба об ва беҳдошт то соли 2030 бояд бошад. Аз ин ҷиҳат олимон, пажӯҳишгарон ва шахсоне, ки дар ин самт кор мебаранд, бояд масъалагузорӣ ва пажӯҳишҳои худро дар чаҳорчӯбаи ғояҳои асосии амалиёти асосии об барои рушди усувор амалӣ намоянд.
Ба иттилои директори Институти масъалаҳои об, гидроэнергетика ва экологияи Академияи илмҳои Ҷумҳурии Тоҷикистон, аз 2,5 то 3 фоизи обҳои ҷаҳонро обҳои нӯшиданӣ ташкил медиҳанд. Аз ҷиҳати серобӣ Ҷумҳурии Тоҷикистон дар байни кишварҳои дунё ҷои намоёнро ишғол намудааст ва аксарияти обҳои Ҷумҳурии Тоҷикистон обҳои ошомиданӣ мебошанд.