Дар Душанбе оқибатҳои номатлуби амалҳои коррупсиониро муҳокима намуданд

ДУШАНБЕ, 21.02.2017 /АМИТ «Ховар»/. Бо мақсади таъмини иҷрои фармони Президенти Ҷумҳурии Тоҷикистон «Дар бораи Стратегияи муқовимат ба коррупсия дар Ҷумҳурии Тоҷикистон барои солҳои 2013-2020» вохӯрии навбатии масъулини Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо кормандони Вазорати корҳои дохилии Ҷумҳурии Тоҷикистон ва зерсохторҳои он, Кумитаи андози назди Ҳукумати Ҷумҳурии Тоҷикистон, Кумитаи давлатии идораи замин ва геодезии Ҷумҳурии Тоҷикистон, Хадамоти гумруки назди Ҳукумати Ҷумҳурии Тоҷикистон, Донишгоҳи Аграрии Тоҷикистон ба номи Шириншоҳ Шотемур, Донишкадаи давлатии забонҳои Тоҷикистон ба номи С.Улуғзода ва Донишкадаи молия ва иқтисоди Тоҷикистон баргузор гардид.
Тавре ба АМИТ «Ховар» аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар доданд, мақсади вохӯриҳо, пеш аз ҳама, ба самъи аҳолӣ расонидани оқибатҳои номатлуби амалҳои коррупсионӣ ва ба ин васила баланд бардоштани маърифати зиддиҳуқуқии шаҳрвандон мебошад.
Зикр гардид, ки дар Тоҷикистон солҳои охир коррупсия падидаи номатлуби ҷомеаи муосир гардида, аъзои солим ва қувваҳои пешқадами ҷамъиятро ба ташвиш овардааст. Имрӯз дар муқовимат ба он танҳо мақомоти ҳифзи ҳуқуқ наметавонанд ба натиҷаҳои назаррас ноил гарданд. Дар сурати ҳамкории ҷомеаи шаҳрвандӣ бо мақомоти ҳифзи ҳуқуқ дар самти муқовимат ба коррупсия ва бартараф намудани оқибатҳои ногувори он дар ҷомеа метавон ба натиҷаҳои назаррас ноил гардид.
Дар ҷамъомад намояндагони масъули агентии мазкур дар мавзӯи таҳлили хавфҳои коррупсия, роҳу усулҳои пешгирӣ намудани омилҳои коррупсионӣ, дарки амиқи зарару оқибатҳои ногувори он, ҳамчунин моҳият ва ҳадафи «Стратегияи муқовимат ба коррупсия дар Ҷумҳурии Тоҷикистон барои солҳои 2013-2020», масъалаҳои иҷрои бечунучарои талаботи қонунгузории зиддикоррупсионӣ ва дар амал татбиқ намудани он сухан гуфтанд.