Ҷиноятҳои қаллобӣ бо суиистифода аз боварӣ

ДУШАНБЕ,15.02.2017. /АМИТ «Ховар»/. Ба ШВКД дар ноҳияи И.Сомонӣ нисбат ба марди 40-солаи сокини ноҳияи Хуросон шикоят ворид гардид, ки ӯ моҳи ноябри соли 2016 аз марди 32-солаи сокини шаҳри Душанбе ба маблағи 190 ҳазор сомонӣ ва аз зани 24-солаи сокини ноҳияи Хуросон 703 ҳазору 556 сомонӣ гирифта, то ҳол барнамегардонад. Дар ин бора аз Вазорати корҳои дохилии Ҷумҳурии Тоҷикистон хабар доданд.
Ҳамин тариқ дар шаҳри Истаравшан ҳангоми гузаронидани тадбирҳои фаврӣ-ҷустуҷӯӣ кормандони милитсия марди 36-солаи сокини шаҳри мазкурро, ки қаблан бо моддаи 247 қисми 3 Кодекси ҷиноятии Ҷумҳурии Тоҷикистон суд шуааст, бо гумони даст доштан дар ҷинояти қаллобӣ дастгир намуданд. Гумонбаршуда соли 2016 ба боварии марди 57-солаи сокини шаҳри Истаравшан даромада, аз ӯ 8 ҳазор доллари амрикоӣ гирифта, то ҳол барнагардонидааст. Инчунин бо ҳамин мазмун ба ШВКД-1 дар ноҳияи Рӯдакӣ зани 53-солаи сокини шаҳри Душанбе муроҷиат намудааст, ки соли 2013 марди 42-солаи сокини ноҳияи Рӯдакӣ аз бовариаш истифода намуда, аз ӯ 77 ҳазор доллари амрикоӣ гирифта, то инҷониб маблағро бозпас намегардонад.
Аз рӯи далелҳои мазкур парвандаҳои ҷиноятӣ оғоз шуда, корҳои тафтишотӣ дар ин самт идома доранд.