Сенати ИМА номзадии Уилбур Россро ба мансаби вазири саноат ва савдо тасдиқ намуд

ДУШАНБЕ, 28.02.2017. /АМИТ «Ховар»/. Шоми рӯзи душанбе, 27 феврал Сенати ИМА номзадии Уилбур Россро ба мансаби вазири савдо тасдиқ намуд. Дар ин бора АИР «Новости» хабар медиҳад.
Дар ҷараёни овоздиҳӣ Росс аз нисф зиёди овозҳоро (аз 100 овоз) ба даст овард. Росс 79-сола буда, ширкати «W.L. Ross & Co.»-ро роҳбарӣ менамуд. Тибқи баҳогузории маҷаллаи «Forbes», дороии Росс 2,5 миллиард долларро ташкил медиҳад.
Трамп номзадии соҳибкорро ба мансаби вазири савдо пешниҳод намуд, ки то ӯ ба бастани созишномаҳои тиҷоратии «одилона» ва коҳиш додани касри тиҷорат бо чунин давлатҳо, ба мисли Хитой ва Мексика ноил гардад.
Акнун ба Росс лозим аст, ки рӯзномаи Трампро дар соҳаи тиҷорат татбиқ намояд. Президент Доналд Трамп аллакай дар бораи баромадани ИМА аз тиҷорати шарикии Фаро-Уқёнуси Ором эълон кард. Ҳамчунин ӯ тасмим гирифтааст, ки созишномаи барои ИМА каме муҳимтарро оид ба минтақаи озоди тиҷоратӣ бо Мексика ва Канада аз нав дида мебарояд. Трамп изҳор медорад, ки ин иқдом дар баргардонидани истеҳсолот дар ИМА ва таъсиси ҷойҳои нави корӣ мусоидат менамояд.