Шабакаи нави «Футбол» ба фаъолият оғоз намуд

Февраль 22, 2017 09:40

ДУШАНБЕ, 22.02.2017 /АМИТ «Ховар»/. Дирӯз дар фазои иттилоотии кишвар боз як шабакаи нави телевизионӣ бо номи «Футбол» ба фаъолият оғоз намуд.
Тавре ки намояндагони Федератсияи футболи Тоҷикистон иброз намуданд, тасмими таъсиси шабакаи «Футбол» баъди аз ҷониби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардидани Соли ҷавонон гирифта шуд. Ҳадаф аз таъсиси шабакаи телевизионии «Футбол» муаррифии наврасону ҷавонони болаёқати кишвар, оммавигардонии футбол ва тарғиби тарзи ҳаёти солим дар байни аҳолии кишвар арзёбӣ мегардад.
Дар маросими ифтитоҳи он Президенти Федератсияи футболи Тоҷикистон, иҷрокунандаи Раиси шаҳри Душанбе Рустами Эмомалӣ, раисони Кумитаи ҷавонон, варзиш ва сайёҳӣ, телевизион ва радиои назди Ҳукумати Ҷумҳурии Тоҷикистон, инчунин роҳбарият ва кормандони телевизиони «Варзиш» ширкат доштанд.
Бино ба маълумоти мутахассисони соҳа, «Футбол» нахустин шабакаи махсусгардонидашудаи телевизионӣ дар Тоҷикистон буда, ба яке аз намудҳои оммавитарин ва дӯстдоштатарини варзиш — футбол бахшида мешавад ва барномаҳои худро дар формати муосири телевизионии сифаташ баланди HD пахш менамояд.
Шабакаи ҷадиди «Футбол»-и Федератсияи футболи Тоҷикистон на фақат вохӯриҳои дастаҳои мунтахаби Тоҷикистон, бозиҳои лигаи олӣ ва аввали футболи Тоҷикистон, балки чемпионатҳо ва мусобиқаҳоеро, ки таҳти васояти Конфедератсияи Футболи Осиё-лигаи чемпионҳо ва Ҷоми Конфедератсияи Футболи Осиё, чемпионатҳои миллии кишварҳои Осиё мегузаранд, инъикос мекунад. Дар эфири шабакаи телевизионии «Футбол» бозиҳои Лигаи чемпионҳо ва Ҷоми УЕФА, Премйер-лигаи Англия, Ла лигаи Испания, бозиҳои «-Серияи А»-и чемпионати Италия, Бундеслигаи Олмон, Лигаи аввали футболи Франсия, Ҷоми Амрико Сентенарио, ҳамчунин вохӯриҳои марказии сойири кишварҳои аврупоӣ бо сифати баланд пахш мегарданд. Дар шабакаи нав, инчунин барномаҳои ҳирфавӣ оид ба чеҳраҳои намоёни ин намуди варзиш, ситораҳои собиқ ва тозазуҳури футбол, аз таърих ва фаъолияти тиму клубҳои алоҳида, чемпионҳои ҷаҳон ва дастаҳои мунтахаби маъруфи олам таҳия ва намоиш дода мешаванд.
Зикр кардан бамаврид аст, ки Ҳукумати мамлакат футболро ҳамчун яке аз бахшҳои асосии сиёсати иҷтимоии давлат эътироф намуда, барои пешрафти он, ҷалби васеи сокинони кишвар бо мақсади оммавигардонии он, солимгардонӣ ва тарбияи ҷисму рӯҳи солим тадбирҳои муассирро амалӣ мегардонад. Ва беҳуда соли 2015 дар мамлакат Соли оммавияти футбол эълон нашуда буд.

Февраль 22, 2017 09:40

Хабарҳои дигари ин бахш

Дар Хуҷанд чемпионати ҷумҳуриявӣ оид ба шиноварӣ ҷамъбаст гардид
«PANDA CUP 2026». Дастаи мунтахаби ҷавонони Тоҷикистон (U-20) бо дастаи Чин мусовӣ бозӣ кард
Дастаи мунтахаби Тоҷикистон оид ба футбол ба финали Кing’s Сup 2026» баромад
Аъзои дастаи мунтахаби наврасони Тоҷикистон (U-17) бар ҳамсолонашон аз Фиҷи пирӯз шуданд
«KING’S CUP 2026». Имрӯз дастаи мунтахаби Тоҷикистон дар даври нимниҳоии мусобиқа бо тими яккачини Умон бозӣ мекунад
Дастаи мунтахаби Тоҷикистон оид ба футзал бозии дӯстонаи дуюмро бо Узбекистон мусовӣ анҷом дод
Дастаи мунтахаби ҷавонони Тоҷикистон (U-20) дар оғози Мусобиқаи «Рanda Сup-2026» бо Кореяи Ҷанубӣ ҳисоби бозиро мусовӣ кард
Дастаи мунтахаби Тоҷикистон омодагӣ ба мусобиқаи «Кing’s Сup 2026»-ро оғоз кард
Паҳлавонони тоҷик аз Чемпионати ҷаҳон оид ба самбо бо шаш медали ифтихорӣ бармегарданд
Дастаи мунтахаби наврасони Тоҷикистон (U-17) бо дастаи Кот-д’Ивуар мусовӣ бозӣ намуд
Президенти Кумитаи миллии паралимпии Тоҷикистон дар ҷаласаи Кумитаи байналмилалии паралимпӣ иштирок намуд
Дастаи мунтахаби футзали Тоҷикистон бозии дӯстонаи якумро бо дастаи Узбекистон анҷом дод