Шабакаи нави «Футбол» ба фаъолият оғоз намуд

Февраль 22, 2017 09:40

ДУШАНБЕ, 22.02.2017 /АМИТ «Ховар»/. Дирӯз дар фазои иттилоотии кишвар боз як шабакаи нави телевизионӣ бо номи «Футбол» ба фаъолият оғоз намуд.
Тавре ки намояндагони Федератсияи футболи Тоҷикистон иброз намуданд, тасмими таъсиси шабакаи «Футбол» баъди аз ҷониби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардидани Соли ҷавонон гирифта шуд. Ҳадаф аз таъсиси шабакаи телевизионии «Футбол» муаррифии наврасону ҷавонони болаёқати кишвар, оммавигардонии футбол ва тарғиби тарзи ҳаёти солим дар байни аҳолии кишвар арзёбӣ мегардад.
Дар маросими ифтитоҳи он Президенти Федератсияи футболи Тоҷикистон, иҷрокунандаи Раиси шаҳри Душанбе Рустами Эмомалӣ, раисони Кумитаи ҷавонон, варзиш ва сайёҳӣ, телевизион ва радиои назди Ҳукумати Ҷумҳурии Тоҷикистон, инчунин роҳбарият ва кормандони телевизиони «Варзиш» ширкат доштанд.
Бино ба маълумоти мутахассисони соҳа, «Футбол» нахустин шабакаи махсусгардонидашудаи телевизионӣ дар Тоҷикистон буда, ба яке аз намудҳои оммавитарин ва дӯстдоштатарини варзиш — футбол бахшида мешавад ва барномаҳои худро дар формати муосири телевизионии сифаташ баланди HD пахш менамояд.
Шабакаи ҷадиди «Футбол»-и Федератсияи футболи Тоҷикистон на фақат вохӯриҳои дастаҳои мунтахаби Тоҷикистон, бозиҳои лигаи олӣ ва аввали футболи Тоҷикистон, балки чемпионатҳо ва мусобиқаҳоеро, ки таҳти васояти Конфедератсияи Футболи Осиё-лигаи чемпионҳо ва Ҷоми Конфедератсияи Футболи Осиё, чемпионатҳои миллии кишварҳои Осиё мегузаранд, инъикос мекунад. Дар эфири шабакаи телевизионии «Футбол» бозиҳои Лигаи чемпионҳо ва Ҷоми УЕФА, Премйер-лигаи Англия, Ла лигаи Испания, бозиҳои «-Серияи А»-и чемпионати Италия, Бундеслигаи Олмон, Лигаи аввали футболи Франсия, Ҷоми Амрико Сентенарио, ҳамчунин вохӯриҳои марказии сойири кишварҳои аврупоӣ бо сифати баланд пахш мегарданд. Дар шабакаи нав, инчунин барномаҳои ҳирфавӣ оид ба чеҳраҳои намоёни ин намуди варзиш, ситораҳои собиқ ва тозазуҳури футбол, аз таърих ва фаъолияти тиму клубҳои алоҳида, чемпионҳои ҷаҳон ва дастаҳои мунтахаби маъруфи олам таҳия ва намоиш дода мешаванд.
Зикр кардан бамаврид аст, ки Ҳукумати мамлакат футболро ҳамчун яке аз бахшҳои асосии сиёсати иҷтимоии давлат эътироф намуда, барои пешрафти он, ҷалби васеи сокинони кишвар бо мақсади оммавигардонии он, солимгардонӣ ва тарбияи ҷисму рӯҳи солим тадбирҳои муассирро амалӣ мегардонад. Ва беҳуда соли 2015 дар мамлакат Соли оммавияти футбол эълон нашуда буд.

Февраль 22, 2017 09:40

Хабарҳои дигари ин бахш

ФУТБОЛ. Пагоҳ бозиҳои даври 16-уми Чемпионати Тоҷикистон миёни дастаҳои Лигаи олӣ оғоз мешаванд
Дар Душанбе барои доварони санъати камонварӣ курси омӯзишии онлайнӣ баргузор шуд
Замони бозиҳои даври нимфинали Ҷоми Тоҷикистон-2020 муайян гардид
Дастаи мунтахаби наврасони то 16-солаи Тоҷикистон бо дастаи Ӯзбекистон ду бозии дӯстона барпо мекунад
Ғолибони Чемпионати Тоҷикистон оид ба шиноварӣ муайян шуданд
ФУТБОЛ. «Регар-ТадАЗ» ва «Истаравшан» ба нимфинали Ҷоми Тоҷикистон роҳ ёфтанд
Фестивали дӯстии ҷавонону варзишгарони Душанбе ҷамъбаст гардид: дастаи ДТТ мақоми аввалро соҳиб шуд
Имрӯз ду бозии чорякниҳоии Ҷоми Тоҷикистон-2020 доир мегарданд
Ғолибони Чемпионати Тоҷикистон оид ба гӯштини тарзи озод муайян шуданд
Дастаи футзали «Соро компания» соҳиби Ҷоми Тоҷикистон гардид
ФУТБОЛ. Дастаи «Равшан» бар дастаи «Истиқлол» бо ҳисоби калон ғолиб омад
Ширкати «Parimatch» шарики расмии букмекерии дастаи футболи «Лестер Сити» гардид