Шанбе — рӯзи варзиш ва солимгардонӣ дар шаҳри Душанбе

ДУШАНБЕ, 20.02.2017. /АМИТ «Ховар»/. Бо ташаббуси мақомоти иҷроияи ҳокимияти давлатии шаҳри Душанбе ва Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар Душанбе мусобиқаҳои гуногуни варзишӣ таҳти унвони «Шанбе-рӯзи варзиш ва солимгардонӣ» доир гардиданд.
Тавре ба АМИТ «Ховар» мудири бахши кор бо ҷавонони Раёсати ҷавонон, варзиш ва сайёҳии шаҳри Душанбе Маҳкамбой Гулов иттилоъ дод, ҷавонону наврасони пойтахт бо ҷонибдорӣ аз сиёсати варзишпарваронаи Пешвои миллат ва дар доираи Соли ҷавонон эълон гардидани соли 2017 дар иншооти варзишии шаҳри Душанбе ба машғулиятҳои оммавию варзишӣ баромада, дар тамринҳо ва мусобиқаҳои варзишӣ иштирок намуданд.
Дар ин замина тадбирҳои варзишӣ бо машқҳои пагоҳирӯзӣ дар боғҳои фарҳангу фароғатӣ ва назди бинои Сирки давлатӣ, мактабҳо ва майдончаҳои варзишӣ оғоз гардида, дар давоми рӯз Чемпионати кушоди шаҳри Душанбе оид ба гӯштини тарзи озод, мусобиқаҳои варзишии рафиқона оид ба намудҳои гӯштин, варзиши сабук, гимнастика, акробатика, таэквондо, камонварӣ, бокс, муҳорибаи тан ба тан, футбол, волейбол, баскетбол, шоҳмот ва шашка гузаронида шуданд.
Дар «Боғи Ирам»-и шаҳри Душанбе бо дастгирии мақомоти иҷроияи ҳокимияти давлатии шаҳри Душанбе аз ҷониби Сафорати Иёлоти Муттаҳидаи Амрико дар Ҷумҳурии Тоҷикистон мусобиқаи варзишии «Дави дӯстӣ» гузаронида шуд, ки дар он ҷавонони фаъол иштирок намуданд.