«Созандагони Ватан» аъзои шӯрои ҷамъиятии Ҷумҳурии Тоҷикистон гардиданд

ДУШАНБЕ, 23.02.2017. /АМИТ«Ховар»/. 22 феврали соли равон дар Маҷмааи давлатии Кохи Ваҳдат ҷаласаи навбатии Шӯрои ҷамъиятии Ҷумҳурии Тоҷикистон доир гардид. Дар шӯро сараввал дастуру супоришҳои Асосгузори сулҳу ваҳдати миллӣ- Пешвои миллат, Раиси Шӯрои ҷамъиятии Ҷумҳурии Тоҷикитон муҳтарам Эмомалӣ Раҳмон, ки ба ҷалби созмонҳои нав ба Шӯро ва зиёд намудани аъзои он аз ҳисоби ҷавонон ва бонувони болаёқат асос меёбад, мавриди баррасӣ қарор дода шуд.
Дар асоси розигии Асосгузори сулҳу ваҳдати миллӣ- Пешвои миллат муҳтарам Эмомалӣ Раҳмон ва қарори Шӯрои марказии ТҶҶ «Созандагони Ватан» масъалаи қабули ТҶҶ «Созандагони Ватан» ба узвияти Шӯрои ҷамъиятӣ мавриди баррасӣ қарор гирифта, аз ҷониби аъзои Шӯро якдилона пазируфта шуд.
Абдулло Раҳмонзода, раиси ТҶҶ «Созандагони Ватан» зикр намуд, ки қабули созмонро ба узвияти Шӯро ҳамчун дастгирии навбатии Пешвои миллат аз ҷавонон ва қадами устувору самарабахш дар роҳи таҳкими ҷомеаи шаҳрвандии кишвар арзёбӣ менамоянд.
«Эълон намудани соли 2017 ҳамчун соли ҷавонон ва дар оғози ин сол пазируфта шудани ТҶҶ «Созандагони Ватан» ба ҳайси аъзои Шӯрои ҷамъиятӣ масъулияти ташкилоти «Созандагони Ватан» ва аъзои онро дар назди давлату миллат даҳчанд меафзояд»,-гуфт А. Раҳмонзода.