«Тоҷик Эйр» пагоҳ парвозҳоро бо хатсайри Душанбе-Хоруғ-Душанбе ба роҳ мемонад

ДУШАНБЕ, 24.02.2017./АМИТ «Ховар»/. Пагоҳ, 25 феврал парвозҳо бо хатсайри Душанбе-Хоруғ-Душанбе тариқи Ширкати ҳавопаймоии Тоҷикистон «Тоҷик Эйр» шурӯъ мешаванд.
Дар ин бора ба хабарнигори АМИТ «Ховар» котиби матбуоти ширкати «Тоҷик Эйр» Азиз Хайруллоев иттилоъ дода, зикр кард, ки парвозҳо дар ин самт ба таври мунтазам бо истифодаи чархболи МИ8 ба роҳ монда мешаванд. Ба иттилои Азиз Хайруллоев, ин чархбол ба шароити иқлими кишвар мувофиқ буда, ҷиҳати парвоз ба ҳама гуна самтҳо муддати 24 соат дар як шабонарӯз омода аст. Бо чархболи Ми-8 метавон 22 нафар мусофиронро ба нуқтаи таъйинот расонид, ки шуморааш аз ҳавопаймои АН-28 зиёдтар мебошад.
Котиби матбуоти ширкати «Тоҷик Эйр» сабаби асосии муваққатан манъ гардидани парвозҳои доимӣ дар хатсайри Душанбе-Хоруғро ба гузаронидани корҳои хизматрасонии техникӣ дар ҳавопаймои АН 28 рабт дод.