Ҳукумати Россия барои Чемпионати ҷаҳон -2018 боз 19 миллиард рубл ҷудо кард

ДУШАНБЕ, 08.02.2017/АМИТ «Ховар»/. Ҳукумати Россия дар барномаи омодагӣ ба бозиҳои ниҳоии Чемпионати ҷаҳон оид ба футбол -2018 тағйирот ворид кард. Дар ин бора «Интерфакс» хабар медиҳад.
Ин тағйирот аз он иборат мебошад, ки ба ҷои 619,6 миллиарди пешбинишуда, боз 19 миллиард илова гардид ва ҳамакнун маблағи умумии он ба 638,8 миллиард рубл баробар шуд. Норасоии ин маблағ аз ҳисоби буҷаи федералӣ пур карда мешавад.
Дар маҷмӯъ маблағгузории минтақаҳо ба Чемпионати ҷаҳон ба 92,2 ва буҷаи федералӣ ба 350,4 миллиард рубл баробар шуд. 196,2 миллиарди дигар бо саҳмгузории шахсони алоҳида ва ҳуқуқӣ амалӣ мешавад.
Чемпионати ҷаҳон оид ба футбол дар соли 2018 аз 14 июн то 15 июли соли 2018 дар 12 варзишгоҳи 11 шаҳри Россия- Москва, Калининград, Санкт-Петербург, Волгоград, Қазон, Нижний Новгород, Самара, Саранск, Ростови лаби Дон, Сочи ва Екатеринбург гузаронида мешавад.